ენერგეტიკის მინისტრი, ვიცე-პრემიერი, კახა კალაძე ამბობს, რომ ის არ აპირებს 2018 წლის საპრეზიდენტო არჩევნებში ბრძოლას. ტელეკომპანია პირველის ეთერში, ტოქ–შოუ "რეაქციის" წამყვანმა, ინგა გრიგოლიამ მას ამ შესაძლებლობის შესახებ ჰკითხა, რაზეც კალაძემ უპასუხა:

"შემიძლია ახლავე გითხრათ, რომ ნამდვილად არა, ჯერ არ ვაპირებ პენსიაზე გასვლას".

კალაძის თქმით, საქართველომ უნდა აიღოს მაგალითები იმ ევროპული სახელმწიფოებიდან, სადაც მოქმედებს საპარლამენტო რესპუბლიკის მოდელი და სადაც პრეზიდენტს პირდაპირი წესით არ ირჩევენ. თუმცა, ის ამბობს, რომ პირადად პრობლემას ვერ ხედავს, თუკი პრეზიდენტს ხალხი აირჩევს. მინისტრის მოსაზრებით, ქართულმა ოცნებამ რადგან მიიღო საკონსტიტუციო უმრავლესობა, მის კანდიდატს არ გაუჭირდება საპრეზიდენტო არჩევნების მოგებაც.