პრემიერმინისტრის, ირაკლი ღარიბაშვილის თქმით, ყოფილი პრემიერმინისტრი, გიორგი გახარია არის შეცდომა.

"გიორგი გახარია არის შეცდომა, მე თუ მკითხავთ და ძალიან სამწუხარო. მე ადრეც ვთქვი და მინდა გავიმეორო, თუმცა მოსახლეობას აღარ აინტერესებს, ალბათ, ამდენი შეფასებები, მაგრამ კიდევ ერთხელ ვიტყვი, ვინაიდან მკითხეთ, ეს კაცი იყო არავინ. ჩამოვიდა 2012 წლის არჩევნების შემდეგ, ხუხაშვილმა მოიყვანა, რეკომენდაცია გაუწია და მაშინ დაინიშნა ჯერ ბიზნესომბუდსმენად, შემდეგ ეკონომიკის მინისტრად, შემდეგ შინაგან საქმეთა მინისტრად, შემდეგ პრემიერმინისტრად", — განაცხადა მან რუსთავი 2-ის ეთერში.

მისივე თქმით, ბიძინა ივანიშვილმა გახარიას ნდობა გამოუცხადა, მან კი უღალატა.

"ეს ყველაფერი ხდება, რა თქმა უნდა, პარტიის დამფუძნებლის, ბატონი ბიძინა ივანიშვილის ნდობით. ამხელა ნდობა გამოუცხადა კაცმა და ეს არავინ აქცია კაცად, რომ იტყვიან ჩააცვეს, დაახურეს, კაცად აქციეს, გადაეფარნენ მას, მთელი გუნდი გადაეფარა მას, გადაარჩინეს და ამ დროს ასეთი ღალატი ჩაიდინა", — თქვა ღარიბაშვილმა.