საქართველოს აეროპორტების გაერთიანების ინფორმაციით, 28 სექტემბრიდან Wizz Air ქუთაისსა და კრაკოვს შორის პირდაპირ, რეგულარულ რეისებს აღადგენს. თავდაპირველად კრაკოვი-ქუთაისი-კრაკოვის რეისი კვირაში 2-ჯერ შესრულდება, შემდეგ კი, ეპიდვითარების მიხედვით, მისი სიხშირის გაზრდა იგეგმება.

ეს გადაწყვეტილება აეროპორტების გაერთიანების მოწვევით, საქართველოში Wizz Air-ის ტოპ მენეჯმენტის სამუშაო ვიზიტისას მიიღეს.

"პოლონეთი, ტრადიციულად, მნიშვნელოვანი და ძლიერი ტურისტული მიმართულებაა ჩვენი ქვეყნისთვის. ჩვენ ვემზადებით შემოდგომისა და ზამთრის ტურისტული სეზონების სათანადო დონეზე წარმართვისთვის და ამ თვალსაზრისით, კიდევ ერთი რეგულარული რეისის დანიშვნა ევროპიდან მნიშვნელოვანია არა მხოლოდ ქუთაისისა და იმერეთის მხარისთვის, არამედ მთელი საქართველოსთვის", — განაცხადა ეკონომიკის მინისტრის მოადგილემ, მარიამ ქვრივიშვილმა.

აეროპორტების გაერთიანების დირექტორის, თამარ არჩუაძის ინფორმაციით, Wizz Air ქუთაისის აეროპორტიდან რეგულარულ რეისებს 9 ქვეყნის 14 მიმართულებით ასრულებს

"რეგულარული ავიაიმოსვლის განახლებიდან, Wizz Air-მა ქუთაისის საერთაშორისო აეროპორტიდან 80 ათასზე მეტი მგზავრი გადაიყვანა. გვაქვს მოლოდინი, რომ ზამთრის სანავიგაციო სეზონზე, ჩვენი სტრატეგიული პარტნიორი საქართველოდან ევროკავშირის ქვეყნების ყველაზე მოთხოვნადი მიმართულებებითაც აღადგენს ფრენებს", — განაცხადა არჩუაძემ.

აეროპორტების გაერთიანების ინფორმაციით, კრაკოვი პოლონეთის რიგით მეხუთე ქალაქია, სადაც სრულდება რეისები ქუთაისის საერთაშორისო აეროპორტებიდან. აქამდე ქუთაისიდან პირდაპირი საჰაერო გზით მოხვედრა მგზავრებს პოლონეთის 4 ქალაქში — ვარშავაში, გდანსკში, ვროცლავსა და კატოვიცეში შეეძლოთ.