სოციალური სამართლიანობის ცენტრი საქართველოს პარლამენტს მოუწოდებს, შეიქმნას საგამოძიებო კომისია, რომელიც გამოიკვლევს სახელმწიფო უსაფრთხოების სამსახურის მხრიდან სავარაუდო მასობრივი უკანონო მიყურადებისა და ადამიანი უფლებების უხეში დარღვევის ფაქტებს, ასევე, დაიწყოს მსჯელობა სუს-ის ფუნდამენტურ რეფორმაზე, მისი ჭარბი ძალაუფლების დეკონცენტრაციასა და ანგარიშვალდებულების მექანიზმების გაზრდაზე.

"სახელმწიფო უსაფრთხოების სამსახურის ძალაუფლება იმდენად ჭარბია, რომ მისი დეკონცენტრაცია და შეკუმშვა ფართო პოლიტიკური დღის წესრიგის შემადგენელი ნაწილი უნდა გახდეს და რადიკალურ ინსტიტუციურ რეფორმებს უნდა დაექვემდებაროს. არსებითია, რომ ეს საკითხები საქართველოს პარლამენტის ინტერვენციის და მუშაობის საგანი გახდეს და საპარლამენტო გამოძიებისა და სუს-ის რეფორმირების პროცესი პოლიტიკური კონსენსუსის პირობებში და ლოგიკით წარიმართოს", — ამბობენ ორგანიზაციაში.

მათივე თქმით, აუცილებელია გრძელვადიან პერსპექტივაში გამოინახოს გზები, რომელიც სუს-ს აქცევს დემოკრატიულ პრინციპებზე დაფუძნებულ, დამოუკიდებელ და საზოგადოებისადმი ანგარიშვალდებულ ორგანოდ, წინააღმდეგ შემთხვევაში, გაგრძელდება როგორც ცალკეული ადამიანის უფლებებისა და ინტერესების უხეში ხელყოფა, ასევე, პოლიტიკური სისტემის ჯანსაღი და სამართლიანი განვითარების შეფერხება.

სოციალური სამართლიანობის ცენტრი, ასევე მოუწოდებს პროკურატურას, მიმდინარე ფაქტებზე დაუყოვნებლივ დაიწყოს დროული, ეფექტიანი და დამოუკიდებელი გამოძიება, საზოგადოებას კი მიაწოდოს ინფორმაცია გამოძიების პროგრესისა და შედეგების შესახებ.