პარტია საქართველოსთვის თავმჯდომარე, გიორგი გახარია აცხადებს, რომ მზად იყო 20 ივნისის მოვლენების შემდეგ შინაგან საქმეთა მინისტრის პოსტი დაეტოვებინა. თუმცა, ის არ აკონკრეტებს, რატომ არ გადადგა მაშინ თანამდებობიდან.

"იმ დღეს, მეც ვიყავი მზად, რომ გადავმდგარიყავი. მე არ მქონდა არანაირი პრობლემა მაშინ გადადგომის, იმიტომ, რომ მე მაშინ მკაფიოდ ვიყავი დარწმუნებული, რომ მე შევასრულე ის ფუნქცია, რაც შინაგან საქმეთა მინისტრს უნდა შეესრულებინა — დავიცავი მთავარი სახელმწიფო ინსტიტუტი ქვეყანაში და ა.შ. მე მაშინ მზად ვიყავი ამ გადადგომისთვის", — განაცხადა გიორგი გახარიამ პალიტრანიუსის ეთერში.

2019 წლის 20-21 ივნისს, ე.წ. გავრილოვის ღამეს, საპროტესტო აქციის დაშლის დროს შინაგან საქმეთა მინისტრი სწორედ გიორგი გახარია იყო. აქციის მონაწილეების დაშლის ბრძანების გაცემის უფლებამოსილებაც მას ჰქონდა. ამის გამო, რუსთაველის გამზირზე შეკრებილი ადამიანები გახარიას შინაგან საქმეთა მინისტრის პოსტიდან გადადგომას უწყვეტად ითხოვდნენ. თუმცა, ის არათუ გადააყენეს, არამედ, არასრული სამი თვის შემდეგ, პრემიერად წარადგინეს.