გირჩი — მეტი თავისუფლებას ლიდერი, ზურაბ ჯაფარიძე აცხადებს, რომ სახელმწიფო უსაფრთხოების სამსახურს უნდა გაუუქმდეს "გესტაპოს ფუნქციები". მისი თქმით, დღეს ქვეყანაში უსმენენ და უთვალთვალებენ ყველას, ვინც საჯაროდ პოზიციას გამოხატავს და აქტიურობს.

"ხელისუფლება უნდა შეიცვალოს, მერე სუს უნდა დაიშალოს და გესტაპოს ფუნქციები რაც აქვს, ისინი უნდა გაუქმდეს საერთოდ. რაც არის კონდაზვერვა, ანტიტერორისტული საქმიანობა და ეგეთი რაღაცები შეიძლება ცალკე სტრუქტურები გააკეთო, მაგრამ, გესტაპო აღარ უნდა გყავდეს. არ უნდა გყავდეს არცერთი სტრუქტურა ქვეყანაში, რომელიც დასდევს და უთვალთვალებს ჟურნალისტებს, პოლიტიკოსებს, არასამთავრობო სექტორს, ნებისმიერ აქტიურ ადამიანს, რომელიც საჯაროდ რაღაც პოზიციას გამოხატავს ან საჯარო საქმიანობაშია ჩართული ყველა არის თვალთვალის ქვეშ, ეგ არის გასაუქმებელი", — განაცხადა ჯაფარიძემ TV პირველის ეთერში.

დღეს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

გავრცელებულ ჩანაწერებთან დაკავშირებით ინფორმაციის მისაღებად On.ge სუს-თან დაკავშირებას შეეცადა. უწყების პრესსამსახურში, ჯერჯერობით, ჩვენს ზარებს არ პასუხობენ. მათ პასუხს მიღებისთანავე შემოგთავაზებთ.

ამავე თემაზე: