ფინანსთა სამინისტროს საგამოძიებო სამსახურმა დააკავა ორი ადამიანი, რომლებსაც ყალბი ქონებრივი უფლებამოსილების დამადასტურებელი დოკუმენტის დამზადება-გამოყენება და სხვისი ქონების უკანონოდ დაუფლება ედება ბრალად. კერძოდ, უწყებაში აცხადებენ, რომ დაკავებულებმა გააყალბეს იტალიის მოქალაქის პასპორტი. შემდეგ, მისი მსგავსი ვიზუალის მქონე ჯერ კიდევ დაუდგენელი პირისა და ყალბი ნასყიდობის ხელშეკრულების გამოყენებით გადაიფორმეს იტალიის მოქალაქის საკუთრებაში არსებული 900 მ2 მიწის ნაკვეთი.

სამინისტროს ინფორმაციით, მიწის ნაკვეთი თბილისში, სოფელ დიღომში მდებარეობს, შემთხვევა კი მიმდინარე წლის აგვისტოში მოხდა. როგორც ირკვევა, ბრალდებულები მაშინ დააკავეს, როცა აღნიშნული მიწის ნაკვეთის გაყიდვას ცდილობდნენ.

"გამოძიების პროცესში დაყადაღდა მართლსაწინააღმდეგოდ დაუფლებული მიწის ნაკვეთი, რომლის საბაზრო ღირებულება წინასწარი მონაცემებით 350 000 ლარს შეადგენს", — განაცხადა ფინანსთა სამინისტროს საგამოძიებო სამსახურის გამომძიებელმა, თეონა დევდარიანმა.

მისი ინფორმაციით, მიმდინარეობს შესაბამისი საგამოძიებო ღონისძიებები საქმეში ჩართული სხვა პირების დასაკავებლად.

გამოძიება საქართველოს სისხლის სამართლის კოდექსის 180-ე მუხლის მეორე ნაწილის ა, ამავე მუხლის მე-3 ნაწილის ბ ქვეპუნქტებითა და 210-ე მუხლის მე-2 ნაწილით მიმდინარეობს. ამ მუხლებით ჩადენილი დანაშაული 6-დან 9 წლამდე თავისუფლების აღკვეთას ითვალისწინებს.