ჯანდაცვის მინისტრის მოადგილის, თამარ გაბუნიას თქმით, თუ 60 წელს ზემოთ ასაკის ადამიანები არ აიცრნენ, შემდეგი ტალღა ამ ასაკობრივი ჯგუფისთვის კრიტიკულად საშიში იქნება. როგორ ის აღნიშნავს, ძალიან საყურადღებოა ის, რომ დღეს ჰოსპიტალიზაციაც და სიკვდილობაც 60 წელს ზემოთ პირებში უფრო მეტია და ყველაზე ნაკლები ვაქცინაციის მაჩვენებელიც 60 წლის ზემოთ პირებში გვაქვს.

"ამდენად, ეს მაჩვენებელი უნდა შეიცვალოს სრულიად საპირისპირო მიმართულებით, რომ ვაქცინირებულებში თანაფარდობა ყველაზე მაღალი გვქონდეს 60 წლის ზემოთ, რომ რეალურად შემსუბუქება ჰოსპიტალური დატვირთვის და ლეტალური გამოსავლების კუთხით ვიგრძნოთ. ამდენად, მეტად მიზნობრივი ვაქცინაციის განხორციელება არის პრიორიტეტი, ამაზე იმსჯელა გუშინ საკოორდინაციო საბჭომ და ვაქცინაციის საბჭომ. პროგრამები, რომელსაც ჯანდაცვის სამინისტრო დაგეგმავს იქნება მეტად მიმართული 60 წლის ზემოთ პირებზე. შემდეგი ტალღა იქნება კრიტიკულად საშიში ამ ასაკობრივი ჯგუფისთვის, თუ არ მივაღწიეთ მათ ვაქცინაციას", — განაცხადა გაბუნიამ.

მისივე თქმით, კორონავირუსის ახალ ტალღებს მომავალი წლისთვის უნდა ველოდოთ.

Stopcov.ge-ზე გამოქვეყნებული ინფორმაციის თანახმად, სულ ჩატარდა — 1 405 877 აცრა, დღიურად აცრილია 24 670 ადამიანი.