ქართული ოცნება კვლავ ამტკიცებს, რომ ოპოზიცია "დესტრუქციისთვის" ემზადება და ამჯერად მათთან "აფილირებულ" სადამკვირვებლო ორგანიზაციებზე საუბრობს. მმართველი პარტია მათ შორის ასახელებს აკაკი ხუსკივაძის ორგანიზაციას და ხაზს უსვამს, რომ მან და აკაკი კობალაძემ მოძრაობა სირცხვილიასთან ერთად არჩევნებზე დასაკვირვებლად ახალი ინიციატივა — სამოქალაქო საარჩევნო კომისია წარადგინეს.

დეპუტატ გივი მიქანაძის განცხადებით, "ოპოზიციასთან დაკავშირებული" არასამთავრობო ორგანიზაციების მიზანი საერთაშორისო საზოგადოებისა და საქართველოს მოსახლეობის შეცდომაში შეყვანაა.

მიქანაძის მტკიცებით, ქართული ოცნება, "როგორც პასუხისმგებლიანი ხელისუფლება", მიზანშეწონილად მიიჩნევს, რომ საზოგადოება დეტალურად იყოს ინფორმირებული "რადიკალური ოპოზიციის ქვეყნისთვის დამაზიანებელი საქმიანობისა და გეგმების შესახებ, რომლითაც მათ სურთ შეამზადონ სიტუაცია და შექმნან ფონი ვითომდა 2 ოქტომბრის არჩევნების გაყალბებასთან დაკავშირებით".

"ხშირ შემთხვევაში, მსგავსი სადამკვირვებლო ორგანიზაციების წარმომადგენლების ძირითად მიზანს საარჩევნო უბნებზე, საარჩევნო პროცესის კანონმდებლობის შესაბამისად მიმდინარეობისთვის ხელის შეშლა და პროვოკაციული მოქმედებების განხორციელება წარმოადგენს, რათა, როგორც საერთაშორისო პარტნიორებს და მოკავშირეებს, ისე ჩვენს საზოგადოებას წინასწარ შეექმნას აღქმა ქვეყანაში საარჩევნო პროცესის ვითომდა კანონდარღვევით მიმდინარეობასთან დაკავშირებით", — განაცხადა მიქანაძემ.

მიქანაძემ ის არასამთავრობო ორგანიზაციები დაასახელა, რომლებიც, მისი ინფორმაციით, ერთიანი ნაციონალური მოძრაობისა და ევროპული საქართველოს მიერ არიან მართული და დაფინანსებულები. დეპუტატის ინფორმაციით, ცესკო-ს მიერ რეგისტრირებული 62 ადგილობრივი სადამკვირვებლო ორგანიზაციიდან 12 ენმ-სთან არის პირდაპირ კავშირში, ხოლო 3 — ევროპულ საქართველოსთან.

გუშინ, 8 სექტემბერს, სამოქალაქო საარჩევნო კომისიამ განაცხადა, რომ ქართული ოცნება საუბნო კომისიებს პარტაქტივით აკომპლექტებს. ამის შესახებ ბრიფინგზე ორგანიზაციის წარმომადგენლებმა ისაუბრეს და 20-ზე მეტი ვიდეო გაავრცელეს, სადაც, მათი თქმით, აღნიშნული პროცესია ასახული. აქტივისტისა და სამოქალაქო საარჩევნო კომისიის წარმომადგენლის, შოთა დიღმელაშვილის თქმით, ქართული ოცნების მიერ წინასწარ შერჩეული კანდიდატების დანიშვნა ხდება საუბნო კომისიების საკვანძო თანამდებობებზე, როგორიცაა კომისიის თავმჯდომარე, მოადგილე და მდივანი.

ქართულმა ოცნებამ "ოპოზიციის გეგმებზე" აქამდეც ისაუბრა. კერძოდ, 30 აგვისტოს, პარტიის ერთ-ერთმა ლიდერმა, შალვა პაპუაშვილმა განაცხადა, რომ ოპოზიცია რეკლამებს იმისთვის არ იყენებს, რომ შემდეგ არათანაბარ საარჩევნო გარემოზე ისაუბროს. მისი თქმით, მათ არა აქვთ სარეკლამო ბილბორდები და არ იყენებენ ფასიან საეთერო დროს. პაპუაშვილის მტკიცებით, ოპოზიციურმა პარტიებმა მუნიციპალიტეტებში არ დააყენეს ისეთი კანდიდატები, რომლებსაც "გამარჯვების მინიმალური შანსი მაინც ექნებოდათ", რათა არჩევნებზე დამარცხების შემდეგ ისაუბრონ, რომ თითქოს ადგილი ჰქონდა მანიპულაციას და მათი წარმომადგენლები სწორედ ამიტომ დამარცხდნენ ყველა სოფელსა და ქალაქში.