სამოქალაქო საარჩევნო კომისიის განცხადებით, ქართული ოცნება საუბნო კომისიებს პარტაქტივით აკომპლექტებს. ამის შესახებ დღეს გამართულ ბრიფინგზე ორგანიზაციის წარმომადგნელებმა ისაუბრეს და 20-ზე მეტი ვიდეო კადრი გაავრცელეს, სადაც მათი თქმით, აღნიშნული პროცესია ასახული.

"საუბნო საარჩევნო კომისიებში საკვანძო თანამდებობების არჩევის პროცესი იმიტირებულია და რეალურად, პოზიციებს ქართული ოცნების მიერ წინასწარ განსაზღვრული პირები იკავებენ", — აღნიშნავენ ორგანიზაციაში.

აქტივისტისა და სამოქალაქო საარჩევნო კომისიის წარმომადგენლის, შოთა დიღმელაშვილის თქმით, ქართული ოცნების მიერ წინასწარ შერჩეული კანდიდატების დანიშვნა ხდება საუბნო კომისიების საკვანძო თანამდებობებზე, როგორიცაა კომისიის თავმჯდომარე, მოადგილე და მდივანი.

საარჩევნო სისტემების სპეციალისტისა და სამოქალაქო კომისიის იდეის ავტორის, აკაკი კობალაძის განცხადებით კი, ისინი კომისიის წევრების თანამდებობაზე არჩევას 25 აგვისტოდან 5 სექტემბრამდე აკვირდებოდნენ. კობალაძე მოუწოდებს ქართულ და საერთაშორისო სადამკვირვებლო ორგანიზაციებს, რომ მათ მიერ გავრცელებული ფაქტები შეისწავლონ და მიმართავს ცენტრალურ საარჩევნო კომისიას, რომ პროცესი გამჭვირვალედ წარმართოს.

"მოვუწოდებთ ცესკოს, რომ მათ კიდევ ერთხელ, მართლაც გამჭვირვალედ და დემოკრატიულად ჩაატარონ საუბნო საარჩევნო კომისიების დაკომპლექტება. წინააღმდეგ შემთხვევაში, მათ მოუწევთ აღიარება, რომ საქართველოში არჩევნებს ატარებს არა ცესკო, არამედ ქართული ოცნება", — განაცხადა მან.

On.ge აღნიშნულზე ცენტრალურ საარჩევნო კომისიასაც დაუკავშირდა. მათ პასუხს მიღებისთანავე შემოგთავაზებთ.

3 სექტემბერს მოძრაობა სირცხვილიამ და საზოგადოებრივი ინიციატივების ასოციაციამ სამოქალაქო საარჩევნო კომისია დააფუძნეს. მათი განმარტებით, კომისია წინასაარჩევნო მონიტორინგს აწარმოებს და ალტერნატიული დათვლის შედეგებს გაავრცელებს, რისი მიზანიც საზოგადოების მაქსიმალური ჩართულობით, არჩევნების გამჭვირვალედ და საერთაშორისო სტანდარტების შესაბამისად ჩატარებაა.