ყოფილი პრემიერმინისტრის, გიორგი გახარიას თქმით, პანდემიის დროს ეკლესია წესებს იცავდა და მათ მადლობას უხდის. ამის შესახებ მან რუსთავი 2-ის ეთერში ისაუბრა და განაცხადა, რომ "მსოფლიო მოიარა კადრებმა, როდესაც ქართულ ეკლესიაში მორწმუნეები დისტანციას იცავენ".

"მინდა უდიდესი მადლობა გადავუხადო საქართველოს თითოეულ მოქალაქეს, რომლებიც განსაკუთრებით, პირველი და მეორე ტალღების დროს გამოგვყვა და თვითშეზღუდვის ისეთი მაგალითი აჩვენა, როგორიც მსოფლიოს ბევრ ქვეყანაში არ ყოფილა. ამასთან, მადლობა მინდა გადავუხადო ქართულ ეკლესიას, რომელმაც მთელი მსოფლიოს მორწმუნეებს ანახა, რას ნიშნავს, შეძლო შენი მსახურების გაგრძელება, მაგრამ ისე, რომ წესები დაიცვა. მსოფლიო მოიარა კადრებმა, როდესაც ქართულ ეკლესიაში მორწმუნეები დისტანციას იცავენ", — აცხადებს ის.

მთელი პანდემიის პერიოდში საქართველოს მართლმადიდებელი ეკლესია რეკომენდაციების უგულებელყოფით გამოირჩეოდა. განსხვავებით მსოფლიო ეკლესიებისგან, საპატრიარქომ 2020 წლის გაზაფხულზე არ შეაჩერა ეკლესიებში მრევლის მიღება, ასევე, ერთი კოვზით ზიარება. ამ პერიოდში ტაძრების მხოლოდ ნაწილში დაცული იყო სოციალური დისტანცია, სხვა რეკომენდაციებს მართლმადიდებელი ეკლესიის წარმომადგენლები, მეტწილად, არ იცავდნენ.

კორონავირუსის პანდემიის პირობებში, სპეციალისტების რეკომენდაციების მიუხედავად, საპატრიარქომ უარი თქვა მთავარი რეკომენდაციის შესრულებაზე და მრევლს სახლში დარჩენისკენ არ მოუწოდა, არც ეკლესიები დაკეტა დროებით. პირიქით, საქართველოს მთავრობა და ეკლესია შეთანხმდნენ, რომ აღდგომის ლიტურგიას მრევლიც დაესწრო.

2020 წლის 17 აპრილს, მაშინ, როდესაც მანქანებით გადაადგილება ყველასთვის აკრძალა, გაირკვა, რომ სასულიერო პირებს, მგალობლებსა და სტიქაროსნებს გადაადგილების პრობლემა არ ექნებოდათ. ამასთან, აღდგომის ღამეს მრევლი სამების ტაძარში ქალაქის სხვადასხვა კუთხიდან ფეხით მივიდა.