ტურიზმის ადმინისტრაციის ინფორმაციით, აგვისტოში საქართველოში 266 544 უცხოური ვიზიტი განხორციელდა, რაც პანდემიის დაწყებიდან დღემდე ერთ თვეში შემოსული ტურისტების რაოდენობის მხრივ რეკორდული მაჩვენებელია.

მიმდინარე წლის აგვისტოში, გასული წლის იმავე თვესთან შედარებით, უცხოური ვიზიტების რაოდენობა 510%-ით არის გაზრდილი, თუმცა 2019 წლის აგვისტოს მონაცემს 75,5%-ით ჩამორჩება. ეს ნიშნავს იმას, რომ პანდემიამდელ პერიოდთან შედარებით ტურიზმი სეზონის ყველაზე მნიშვნელოვან თვეს მხოლოდ 24,5%-ით აღდგა.

მიმდინარე წლის აგვისტოში ვიზიტორთა ძირითადი ნაწილი რუსეთიდან, თურქეთიდან და უკრაინიდან შემოვიდა. ამ სამი ქვეყნიდან განხორციელებული ვიზიტების წილი საქართველოში შემოსულ სტუმრების მთლიან რაოდენობაში 39% იყო.

სტატისტიკის მიხედვით, ვიზიტების ძირითადი ნაწილი, 58,6% საჰაერო გზით, 40,2% — სახმელეთო, 1% — სარკინიგზო, ხოლო 0,2% საზღვაო გზით განხორციელდა.

აგვისტოში ვიზიტების 7% ერთდღიანი იყო, ხოლო 92% — ტურისტული. ტურისტულში ისეთი სახის ვიზიტები იგულისხმება, როდესაც ვიზიტორი მინიმუმ ერთი ღამით რჩება საქართველოს ტერიტორიაზე.

რაც შეეხება მიმდინარე წლის პირველი რვა თვის მაჩვენებლებს, როგორც საზღვრის კვეთის მონაცემებიდან ხდება ცნობილი, 2021 წლის იანვარ-აგვისტოში საქართველოში სულ 961 572 უცხოური ვიზიტი განხორციელდა, რაც გასული წლის იმავე პერიოდის მაჩვენებელს 27,1%-ით, ხოლო 2019 წლის იანვარ-აგვისტოს მონაცემს 81,5%-ით ჩამორჩება.

ტურიზმიდან მიღებული შემოსავლები

ამ დროისათვის ტურიზმიდან მიღებული შემოსავლების აგვისტოს თვის მონაცემები არ არის ცნობილი. ეროვნული ბანკის შეფასებით, მიმდინარე წლის იანვარ-ივლისში უცხოური ტურიზმიდან 505,1 მილიონი აშშ დოლარი მივიღეთ, რაც გასული წლის იმავე პერიოდის მაჩვენებელს 7,8%-ით აღემატება — 2020 წლის პირველ შვიდ თვეში ტურიზმიდან ქვეყანაში 468,6 მილიონი დოლარი შემოვიდა.

ტურიზმიდან მიღებული შემოსავლები 2019-2021 წლებში (მილიონი დოლარი)

წყარო: ეროვნული ბანკი

მხოლოდ ივლისში ტურიზმმა 205,3 მილიონი დოლარი მოგვიტანა, რაც 2020 წლის შესაბამის თვესთან შედარებით 1 597%-ით მეტია. აქ განსაკუთრებით არის ასახული პანდემიის ეფექტი, რადგან გასული წლის ივლისში ტურიზმიდან 12,1 მილიონი დოლარი შემოვიდა. აქვე უნდა აღინიშნოს, რომ მიმდინარე წლის ივლისში, 2019 წლის იმავე თვესთან შედარებით, ტურიზმიდან მიღებული შემოსავლები 48%-ით არის შემცირებული.

აღსანიშნავია, რომ 2020 წლის იანვარ-ივლისში, 2019 წლის იმავე პერიოდთან შედარებით, ტურიზმიდან მიღებული შემოსავლები 72,7%-ით არის შემცირებული, რადგან 2019 წლის პირველ შვიდ თვეში ტურისტულმა შემოსავლებმა 1,85 მილიარდ დოლარს მიაღწია.

ჯამში, 2019 წელს ტურიზმიდან 3,3 მილიარდის, ხოლო 2020 წელს 541,7 მილიონი დოლარის შემოსავალი მივიღეთ.

აღსანიშნავია, რომ ბოლო თვეების განმავლობაში როგორც ვიზიტების, ასევე ამ ვიზიტებიდან მიღებული შემოსავლების მატება შეინიშნება, თუმცა არსებული სტატისტიკით, ტურიზმის მაჩვენებლები პანდემიამდელ მონაცემებს მნიშვნელოვნად ჩამორჩება.