თბილისის მერობის კანდიდატის, კახა კალაძის შეფასებით, გიორგი გახარიას გადაწყვეტილებამ საკუთარი კანდიდატურა დაეყენებინა თბილისის მერობის არჩევნებში ნათელი გახადა, რომ ის არ არის ქართული ოცნებისა და ბიძინა ივანიშვილის "პროექტი". კალაძის თქმით, მისი თანაგუნდელებისთვისაც ნათელი გახდა ყველაფერი და სწორედ ამის გამო ტოვებენ პარტიას.

"მიზანმიმართული ტყუილის გავრცელება მიდიოდა, რომ თითქოს გახარია იყო ქართული ოცნების პროექტი, ბიძინა ივანიშვილის პროექტი, შესაბამისად ეს იყო ძალიან დიდი ტყუილი და დადასტურდა კიდევაც, რომ მან თბილისში დააყენა თავისი კანდიდატურა პირადად ჩემ წინააღმდეგ. ალბათ, ის ადამიანები ვინც კი გაურკვევლობაში იყო, საეჭვოდ უყურებდნენ ამას, ფიქრობდნენ, რომ მართლა ასე ხომ არ არის. მე მგონი ყველასთვის ნათელია და შესაბამისად, ამის გამო იღებენ ალბათ ამ გადაწყვეტილებას და ტოვებენ პარტიას", — აღნიშნა კახა კალაძემ.

გიორგი გახარიას პარტიის წევრმა ადიგენში Facebook-ზე დაწერა, რომ ქართული ოცნების მხარდამჭერია. ამის შესახებ ჟურნალისტებმა პარტიის ლიდერს ჰკითხეს, რომელმაც თქვა, რომ მათი სიის წევრებზე მთელი ქვეყნის მასშტაბით მიმდინარეობს ზეწოლა.

"მე როგორც ვიცი, ეს ადამიანი იყო რიგითი წევრი, რომელიც თავისი სურვილით მოვიდა, თავისი სურვილით გაწევრიანდა. შემდგომ, მასზე მოხდა ზეწოლა სამართალდამცავი სისტემის და სტრუქტურების მიერ და დააწერინეს ის რაც დაწერა. ასეთი შემთხვევები ბევრი ხდება — აი მაგალითად, მე შემიძლია გითხრათ, პარალელურად, ყოველდღიურად, სტატისტიკურად — შეგიძლიათ აიღოთ ჩვენი პარტიის საქართველოსთვის სიები — საკრებულოში კანდიდატების სიები — ამ ადამიანებზე პირდაპირ ხდება ზეწოლა, იმისთვის, რომ მათ უარი განაცხადონ სხვადასხვა მიზეზებით, შემდგომ ამის მიზანი გახლავთ, რომ რაოდენობა სიის თუ შემცირდა — მერე სია იხსნება არჩევნებიდან", — აღნიშნა გიორგი გახარიამ.

1-ლ სექტემბერს ცნობილი გახდა, რომ ექსპრემიერი გიორგი გახარია თბილისის მერობისთვის იბრძოლებს. ამან მისი ყოფილი თანაგუნდელების მორიგი კრიტიკა გამოიწვია. მამუკა მდინარაძის განცხადებით, "მელიასთვის გადადგა და ახლა მელიას მეორე ტურში გასათრევად იწყებს ბრძოლას", ხოლო ირაკლი კობახიძე ამბობს, რომ "არჩევნები არ არის ოლიმპიადა, რომ ბრინჯაოს მედლისთვის იბრძოლო და "მესამე ადგილისთვის არ იბრძვიან არჩევნებში".

იმავე დღეს ქართული ოცნების თავმჯდომარემ, ირაკლი კობახიძემ განაცხადა, რომ ქართული გახარიას მხრიდან მინიშნებები იყო იმასთან დაკავშირებით, რომ თუ "ოცნების" მხრიდან ფინანსური მხარდაჭერა იქნებოდა, ექსპრემიერი თავის კანდიდატურას არ წამოაყენებდა.

გაიგეთ მეტი: