პირველი საუნივერსიტეტო კლინიკის დირექტორის, ლევან რატიანის თქმით, კლინიკაში კოვიდპაციენტებისთვის თავისუფალი ადგილი აღარ არის. რატიანი ამბობს, რომ კლინიკაში თავისუფალი საწოლები ერთი საათის განმავლობაშიც კი არ ნარჩუნდება.

"ბოლო პერიოდში არცერთი თავისუფალი ადგილი არ გვაქვს, თუ ვინმეს ვწერთ, დაახლოებით 20-25 პაციენტი ყოველდღიურად ეწერება ჩვენი კლინიკიდან, მაგრამ დინამიურად მიმდინარეობს პროცესი და მიღებაც ასევე ხდება, ცარიელი საწოლები ერთი საათითაც კი არ გვაქვს", — ამბობს რატიანი TV პირველთან.

5 სექტემბრის მონაცემებით, საქართველოში კორონავირუსის 2 210 ახალი შემთხვევა დადასტურდა, გამოჯანმრთელდა 5 587, ხოლო გარდაიცვალა — 74 ადამიანი.

ქვეყანაში Covid-19-ის პანდემიის გავრცელებიდან დღემდე დადასტურებული შემთხვევების საერთო რაოდენობა შეადგენს 564 837-ს, მათგან გამოჯანმრთელდა — 514 768, ხოლო ვირუსს ჯამში ემსხვერპლა 7 806 ადამიანი.

Stopcov.ge-ზე გამოქვეყნებული ინფორმაციის თანახმად, ამ დროისათვის სულ ჩატარდა 1 314 104 აცრა, დღიურად აცრილია — 22 733 ადამიანი.