რამდენიმე დღის წინ Youtube-ზე სნუპ დოგის ახალი სიმღერა გამოჩნდა, რომელსაც ამ დროისთვის ორ მილიონზე მეტი ნახვა აქვს.

კლიპში ადამიანებს კლოუნების ფორმებში არიან გამოწყობილები. აქ ნახავთ ჟურნალისტებს, ტელეწამყვანებს, პოლიციელებს, პოლიტიკოსებსა და უბრალო მოქალაქეებს.

კლოუნებს შორის აშშ-ის პრეზიდენტი დონალდ ტრამპის პროტოტიპიცაა, რომელსაც კლიპში რონალდ კლამპი ჰქვია, თეთრი სახლი კი კლოუნების სახლად არის მოხსენიებული.

ერთ-ერთ კადრში სნუპი "რონალდ კლამპს" ესვრის, ოღონდ არა ნამდვილ იარაღს, არამედ ჯამბაზების სათამაშო იარაღს, რომლის ლულიდანაც დროშა ვარდება და ზედ "Bang" აწერია.

ცხადია, კლიპი რეაქციის გარეშე არ დაუტოვებია თავად დონალდ ტრამპს, რომელმაც, ტრადიციულად, ტვიტერზე დაწერა თავისი აზრი.

"წარმოგიდგენიათ, როგორი რეაქცია ექნებოდათ, სნუპ დოგს, რომლის კარიერაც დაღმა მიდის, თავის კლიპში რომ ობამას ესროდეს? ციხე!", წერს ტრამპი.

კლიპს გამოეხმაურა პრეზიდენტის პირადი იურისტი მაიკლ კოენიც.

"შოკირებული ვარ, აღმაშფოთებელი ვიდეოა და არაფერი სასაცილო მასში არ არის. ძალიან ვწუხვარ, რომ სნუპ დოგი უკეთესი მეგონა ვიდრე სინამდვილეში ყოფილა", თქვა კოენმა.

სნუპ დოგის ტრამპისადმი უარყოფითი დამოკიდებულება არავის გაჰკვირვებია, მას არაერთხელ გამოუხატავს პრეზიდენტის მისამართით პროტესტი.

ჯერ კიდევ 2016 წლის ნოემბერში, ტრამპის საპრეზიდენტო არჩევნებში გამარჯვების შემდეგ, რეპერმა კანადის მოქალაქეობის მიღების სურვილიც კი გამოთქვა.