კორონავირუსით გარდაცვლილი ქალის ახალშობილი ტყუპების ჯანმრთელობის მდგომარეობა კრიტიკულია. ამის შესახებ On.ge-ს კლინიკა ბომონდში უთხრეს.

კოვიდინფიცირებულ ქალი დღეს, ბოკერიას სახელობის კლინიკაში გარდაიცვალა. შვილები მან დაახლოებით ორი კვირის წინ, კლინიკა ბომონდში გააჩინა. როგორც ბოკერიას კლინიკაში აცხადებენ, მათთან პაციენტი მდგომარეობის დამძიმების შემდეგ გადაიყვანეს. მათივე თქმით, ქალს ძლიერი სუნთქვის უკმარისობა აღენიშნებოდა.

"დაახლოებით 10 დღის წინ, ეს გოგონა მივიდა სხვა კლინიკაში, სხვა ქალაქში, როგორც კორონა დადასტურებული, ფეხმძიმე, სადაც ჩაუტარდა საკეისრო კვეთა და შემდგომში უკვე კლინიკამ გვთხოვა, დავხმარებოდით პოსტოპერაციულ მენეჯმენტში, გადმოიყვანეს ჩვენთან.

შემოსვლისას უკვე საკმაოდ გამოხატული ისეთი სუნთქვის უკმარისობა ჰქონდა, რამდენიმე საათის დაყოვნების შემდეგ ემერჯენსში, როგორც არის მიმღებში, სპეციფიური, პროტოკოლური კვლევები ჩაუტარდა, გაფორმდა დოკუმენტაცია ა.შ. და რეალურად ერთი-ორი საათის მერე წავიყვანეთ მეანგინეკოლოგიურ განყოფილებაში, გადაწყდა მისი რეანიმაციულ დეპარტამენტში მიმართვა, იმიტომ, რომ ძალიან მკვეთრად გამოხატული სუნთქვის უკმარისობა ჰქონდა", — განუცხადეს On.ge-ს კლინიკაში.

მათივე თქმით, ქალის მდგომარეობა დაახლოებით 1 კვირის წინ დამძიმდა.