პრემიერმინისტრის, ირაკლი ღარიბაშვილის განცხადებით, საქართველოში ამ მომენტისთვის საკმარისზე მეტი ვაქცინაა. ასე პასუხობს ის ჟურნალისტის კითხვას, უთხრა თუ არა უარი საქართველოს მთავრობამ ლატვიას 50 ათასი დოზა AstraZeneca-ს ჩუქებაზე.

"საქართველომ და ჩვენ, მთავრობამ მოვახერხეთ და შემოვიტანეთ, ამ მომენტისთვის, საკმარისზე მეტი ვაქცინა. Pfizer დღეის მდგომარეობით, კიდევ მილიონი გვაქვს, Sinovac, რომელიც ასევე იდენტურია და ანალოგიურია, როგორიც არის Sinopharm, კიდევ დამატებით, ერთი მილიონი Sinopharm მაქვს შეკვეთილი და ვმუშაობთ, ორ მილიონ Pfizer-ზე. AstraZeneca ასევე შემოვიტანეთ, მაგრამ როგორც მეუბნებიან ჩვენი ეპიდემიოლოგები და ექიმები, ნაკლებად მოთხოვნადი და პრიორიტეტული იყო ჩვენი მოსახლეობის მხრიდან", — აცხადებს ის.

ღარიბაშვილის თქმით, ქვეყანაში ვაქცინები რომ არ იყოს და მაშინ ეთქვათ უარი, "ეს იქნებოდა პირდაპირ დანაშაული", მაგრამ მისი განცხადებით, როცა სამი მილიონი ვაქცინა გვაქვს, მათი "სუვერენული არჩევანია", რომ ის ვაქცინა შემოიტანონ, რაც მოქალაქეებს უნდა.

დღეს, ევროპული საქართველოს ერთ-ერთმა ლიდერმა, გიორგი კანდელაკმა გაავრცელა ინფორმაცია, რომ მთავრობამ ლატვიის მიერ ვაქცინის 50 ათასი დოზის ჩუქებაზე უარი თქვა. მისი განცხადებით, ეს სწორედ მაშინ მოხდა, როცა ლიტვამ, ლატვიამ და ესტონეთმა ღარიბაშვილი რიგაში, ვილნიუსსა და ტალინში "არ ჩაუშვა".