თბილისის მერობის კანდიდატის, კახა კალაძის განცხადებით, ოპოზიცია არ ცდილობს საკუთარი რესურსის გამოყენებას, რადგან იციან, რომ არჩევნებში დამარცხდებიან. მისი თქმით, მათ უბრალოდ "არ უნდათ ფულის გადაყრა წაგებულ არჩევნებში".

"კვლევებს ეგენიც ხომ ატარებენ, ხომ იციან რეალურად რა მდგომარეობაა. ვის რა მხარდაჭერა აქვს, როგორი თანადგომა აქვს კახა კალაძეს დედაქალაქში მაგალითად. ყველაფერი კარგად იციან და უბრალოდ არ უნდათ ფულის გადაყრა წაგებულ არჩევნებში. წინასწარ იციან რეზულტატი, თუ რა იქნება", — ამბობს კახა კალაძე.

დღეს, 31 აგვისტოს ქართული ოცნების ერთ-ერთმა ლიდერმა, შალვა პაპუაშვილმა თქვა, რომ ოპოზიცია რეკლამებს იმიტომ არ იყენებს, რომ შემდეგ არათანაბარ საარჩევნო გარემოზე ისაუბროს. მისი თქმით, მათ არა აქვთ სარეკლამო ბილბორდები და არ იყენებენ ფასიან საეთერო დროს. პაპუაშვილის განცხადებით, ოპოზიცია, ფაქტობრივად, არ აწარმოებს საარჩევნო კამპანიას, "შეგუებულია გარდაუვალ მარცხს" და არა 2 ოქტომბრის არჩევნებისთვის, არამედ არჩევნების მეორე დღისთვის და არეულობისთვის ემზადება.