ცენტრალური საარჩევნო კომისიაში (ცესკო) აცხადებენ, რომ 2021 წლის თვითმმართველობის არჩევნებზე, შესაძლოა, რამდენიმე უბანზე ხმის მიცემა ელექტრონულად იყოს შესაძლებელი. ეს არის საპილოტე პროგრამა, რომელიც ხმებს ელექტრონულად დაითვლის და შედეგები პროცედურის დასრულებისთანავე გახდება ცნობილი.

ამ თემის განსახილველად დღეს ცესკოს თავმჯდომარე, გიორგი კალანდარიშვილ კომპანია სმარტმატიკის წარმომადგენელს შეხვდა.

"ეს არის ერთ-ერთი შესაძლებლობა, რომელსაც მინიმუმამდე დაყავს ყოველგვარი მანიპულაციის შესაძლებლობა კენჭისყრის დღეს. ამასთან ქმნის შედეგების ძალიან მცირე დროში მიღების შესაძლებლობას, ფაქტობრივად კენჭისყრის პროცედურების დასრულებისთანავე, რამდენიმე წუთში იქნება შესაძლებელი იმ კონკრეტული უბნის შედეგების გამოცხადება. ამ დეტალური განხილვების შედეგად უახლოეს დღეებში ცესკო მიიღებს კონკრეტულ გადაწყვეტილებას", — განაცხადა კალანდარიშვილმა შეხვედრის შემდეგ.

"ვიმედოვნებთ რომ საარჩევნო ადმინისტრაცია ტექნოლოგიური სიახლის დანერგვას შეუწყობს ხელს, რომლის პილოტირება 2021 წლის 2 ოქტომბრის არჩევნებზე მოხდება. აღნიშნული ტექნოლოგიური სიახლე უკვე დაინერგა მრავალ სხვა ქვეყანაში, ჩვენ აღნიშნულ სერვისს 25 სხვადასხვა ქვეყანაში ვახორციელებთ", — განაცხადა კომპანია სმარტმატიკის წარმომადგენელმა ლუის კორონელიმ.

ცესკოს ინფორმაციით, აღნიშნული ტექნოლოგია მსოფლიოს მასშტაბით ბევრ ქვეყანაშია გამოცდილი და მისი გამოყენებით ნაწილობრივ ან სრულად ტარდება არჩევნები ისეთ ქვეყნებში როგორებიცაა ამერიკის შეერთებული შტატები, დიდი ბრიტანეთი, საფრანგეთი და აზიის ბევრი ქვეყანა.