სხვადასხვა საერთაშორისო მედიაში ვრცელდება ინფორმაცია, რომ ქაბულის აეროპორტთან აფეთქებას 13 ადამიანის სიცოცხლე ემსხვერპლა. BBC ადგილობრივ სამედიცინო დაწესებულებებზე დაყრდნობით წერს, რომ დაშავებულია, მინიმუმ, 60 ადამიანი. მედიის ცნობით, დაიღუპა 4 ამერიკელი საზღვაო ქვეითიც.

გამოცემა წერს, რომ აფეთქების შემდეგ, რამდენიმე ქვეყანამ ევაკუაციის დროებით შეჩერების გადაწყვეტილება მიიღო. პროცესს არ გააჩერებს დიდი ბრიტანეთი. ამასთან, პენტაგონი ადასტურებს, რომ თავდასხმას რამდენიმე ამერიკელი სამხედრო ემსხვერპლა.

ქაბულის აეროპორტთან აფეთქება დღეს, 26 აგვიტოს მოხდა. სამი ამერიკელი ჩინოვნიკის განცხადებით, ეს თვითმკვლელი ტერორისტების თავდასხმა იყო. აფეთქება მაშინ მოხდა, როდესაც აეროპორტის შესასვლელთან ავღანელი მოქალაქეები იყვნენ შეკრებილნი, რომლებიც აეროპორტის შენობაში შესვლას ცდილობდნენ.

დღეს, 26 აგვისტოს, გავრცელდა ინფორმაცია, რომ ქაბულის აეროპორტზე, საიდანაც იმ ადამიანების ევაკუაცია მიმდინარეობს, ვისაც ქვეყანაში დარჩენით საფრთხე ემუქრებათ, ISIS-ის თვითმკვლელი მებრძოლები ტერაქტს გეგმავდნენ. ამის გამო, აშშ-მა და მოკავშირეებმა ქაბულის აეროპორტის დატოვებისა და არმისვლისკენ მოუწოდეს. მიუხედავად იმისა, რომ თალიბანი 31 აგვისტომდე აეროპორტის უსაფრთხოების გარანტიას იძლეოდა, დასავლეთი მიიჩნევდა, რომ ISIS-ის მოსალოდნელი ტერაქტის საფრთხის უგულვებელყოფა არ შეიძლებოდა.

წაიკითხეთ ასევე: