თბილისის სააპელაციო სასამართლომ არ განიხილა განზრახ მკვლელობის ბრალდებით დაკავებული ოლიმპიური ჩემპიონის, ზურაბ ზვიადაურის საჩივარი აღკვეთის ღონისძიების შეცვლის თაობაზე. როგორც ზვიადაურის ადვოკატმა, ტარიელ მურმანიშვილმა On.ge-ს უთხრა, შესაძლოა ეს გადაწყვეტილება სტრასბურგის სასამართლოშიც გაასაჩივრონ.

"ახლა ერთადერთი [გამოსავალი] არის ადამიანის უფლებათა ევროპული სასამართლო. ჩამოვყალიბდებით მაგაზე. მე მგონი, მივმართავთ", — განაცხადა ტარიელ მურმანიშვილმა.

23 აგვისტოს მურმანიშვილმა სააპელაციო სასამართლოს იმ 30 ადამიანის სია წარუდგინა, რომლებიც ზვიადაურს თავდებში უდგებოდნენ. მურმანიშვილმა მაშინ On.ge-ს უთხრა, რომ მათ შორის არიან სპორტსმენები და სხვა "საზოგადოებაში პატივცემული ადამიანები".

ზურაბ ზვიადაურს აღკვეთის ღონისძიების სახით პატიმრობა თელავის რაიონულმა სასამართლომ 18 აგვისტოს შეუფარდა. დაცვის მხარე მათ გათავისუფლებას გირაოსა და პირადი თავდებობის სანაცვლოდ ითხოვდა. კერძოდ, ადვოკატები 50 000 ლარიან გირაოს შეფარდებას ითხოვდნენ, ასევე, თავდებში უდგებოდნენ ოლიმპიური ჩემპიონები — ლაშა ტალახაძე და ლაშა ბექაური, ასევე ევროპისა და მსოფლიოს ჩემპიონი, ავთანდილ ჭრიკიშვილი და ქართული ოცნების ყოფილი დეპუტატი, ზაქარია ქუცნაშვილი.

ზურაბ ზვიადაური პოლიციამ განზრახ მკვლელობის ბრალდებით 17 აგვისტოს დააკავა. შსს-ს ინფორმაციით, ზვიადაურმა სასიკვდილოდ დაჭრა პირი, რომელმაც მისი ძმა, ზვიად ზვიადაური მოკლა. ის თავს დამნაშავედ არ ცნობს.

გაიგე მეტი: