ჭყონდიდის მიტროპოლიტი პეტრე 9 მარტის სინოდის სხდომას მიკერძოებულს უწოდებს. მისი თქმით, ეკლესიაში არსებულ მრავალრიცხოვან დარღვევათა გამოსასწორებლად, სჯულის კანონის გამოყენება მხოლოდ მისით არ უნდა დაიწყოს და მისითვე არ დამთავრდეს. ამის შესახებ მან საქართველოს მართლმადიდებლური ეკლესიის პატრიარქს, სინოდის სხდომის მდივანსა და ღვმდელმთავრებს, სინოდის წევრებს მიმართა. წერილი ნეტგაზეთმა გაავრცელა.

"რატომ გვიჭირს ვაღიაროთ ის სამწუხარო ფაქტი, რომ ჩვენს ეკლესიაში წმინდა მამათა კანონები დატევებულია და ყოველგვარი სიმკაცრე განდევნილი? ვშიშობ, რომ საეკლესიო საქმენი სრულ არეულობაში არ მოვიდეს, როდესაც ეს გულგრილობა და მიკერძოებულობა ნელ-ნელა თავისი გზით წავა და ცუდ შედეგამდე მიგვიყვანს," - წერს მიტროპოლიტი.

მისი მოსაზრებით, სინოდისთვის ეკლესიის დისკრედიტაციის ფაქტების შესახებ ინფორმაცია არაერთხელ მიუწოდებია და მის "წინააღმდეგ დაწყებული და დაუსაბუთებელი ცილისწამებები" ეკლესიის დისკრედიტაციას ნიშნავს.

"წარმოუდგენელი და მოულოდნელი იყო, რომ სინოდის სხდომა ისე ჩაივლიდა, აქცენტი მხოლოდ ჩემი უღირსებისთვის ესოდენ მკაცრი და უსამართლო განჩინების გამოცხადებით დასრულდებოდა, რაც მდივნის მიერ იყო წაკითხული და ვეჭვობ, არა მის მიერ დაწერილ იქნა ყოველივე ეს," - წერს მიტროპოლიტი.

მისი თქმით, მისი გამოსვლა, რომ ეკლესიის დისკრედიტაციას ემსახურებოდა, ცილისწამებაა და იტოვებს ვალდებულებას, მის მიმართ გამოთქმულ ბრალდებებს პასუხი გასცეს.

ფოტო: ნეტგაზეთი

სინოდის სხდომაზე, რომელსაც მიკერძოებულს უწოდებს მიტროპოლიტი, მას გაფრთხილება მისცეს და საპატრიარქოს ტელევიზიის დირექტორის თანამდებობიდან გადააყენეს.