ევროპული საქართველოს წევრი, გიორგი ნონიაშვილი აცხადებს, რომ კოვიდპანდემიის გამო თვითმმართველობის არჩევნების გადადებაზე მსჯელობა ლეგიტიმურია. მისი თქმით, ხელისუფლება ამ საკითხს გულგრილად უყურებს.

"არჩევნების გადადებაზე მსჯელობა არის სრულებით ლეგიტიმური, ოღონდ ამაზე უნდა იმსჯელოს და გადაწყვეტილება მიიღოს ხელისუფლებამ. დღეს მძიმე მდგომარეობა გვაქვს კოვიდთან დაკავშირებით. ჩვენი ვალია, რომ კოვიდს ვებრძოლოთ და ყველა შესაძლო წესი დავიცვათ იმისთვის, რომ ადამიანების სიცოცხლე ნაკლები საფრთხის ქვეშ დადგეს. ამიტომ, შეიძლება არჩევნების გადადებაზე მსჯელობა, ოღონდ ამასთან დაკავშირებით ხელისუფლების სურვილი უნდა არსებობდეს, რომელიც სამწუხაროდ პანდემიას გულგრილად უყურებს და არ ცდილობს, რომ მდგომარეობა გააუმჯობესოს", — განაცხადა ნონიაშვილმა.

პანდემიის გამო არჩევნების გადადებასთან დაკავშირებით მსჯელობის დაწყების იდეა გუშინ სახალხო დამცველმაც გააჟღერა. ნინო ლომჯარიას განცხადებით, როცა ქვეყანაში დღიურად 60-70 ადამიანი იღუპება და მოქალაქეთა სათანადო რაოდენობა ვაქცინირებული არ არის, არ შეიძლება, "ყველაფერი იყოს ღია".

ადგილობრივი თვითმმართველობის არჩევნების ჩატარება 2 ოქტომბერსაა დაგეგმილი.