გუდამაყარში, ერთ-ერთ უსახელო მწვერვალს ოლიპმიური ჩემპიონის, ლაშა ბექაურის სახელი დაერქმევა. ამის შესახებ On.ge-ს გუდამაყრის გამგებელმა, მალხაზ წიკლაურმა უთხრა.

"მე პირადად ვესაუბრე მთამსვლელთა ფედერაციის პრეზიდენტს, ბატონ შოთა მირიანაშვილს, ვესაუბრე დუშეთის კულტურული მემკვიდრეობის დაცვის სამსახურის ხელმძღვანელს ბაბუა ალუდაურს, სადაც მივაღწიეთ შეთანხმება, რომ ერთ-ერთ უსახელო მწვერვალს დაერქმევა ლაშა ბექაურის სახელი", — განაცხადა მალხაზ წიკლაურმა.

წიკლაური გვიყვება, რომ გუშინ, 22 აგვისტოს ბექაურის პატივსაცემად გუდამაყარში ღონისძიება მოეწყო, სადაც მას სხვა საჩუქრებიც გადასცეს — 500 კვ. მეტრი მიწა, ყაბარდოული ჯიშის კვიცი და ნაბადი. წიკლაური ხაზს უსვამს იმასაც, რომ ღონისძიება კოვიდრეგულაციების მაქსიმალური დაცვით ჩატარდა.

"იმ ბექაურების სამკვიდრო ადგილას, სადაც მისი წინაპრები ცხოვრობდნენ გადაეცემა 500 კვ. მეტრი მიწის ფართი საცხოვრებელი სახლის ასაშენებლად. გუდამაყრელებმა პირობა დადეს, რომ თითო ქვა რომ ყველამ დავდოთ, ერთ თვეში ავაშენებთ ლაშას სახლსო. იმ დღეს, როცა ლაშამ გაიმარჯვა, 28-ში, დაიბადა ყაბარდოული ჯიშის კვიცი და ესეც ლაშას ვაჩუქეთ [...]

ძალიან გული მწყდება, რომ რეგულაციების გამო ბევრი ხალხი ვერ დაესწრო. ჩვენ არ გავახმაურეთ. ყველას უნდოდა მოსვლა, მაგრამ, ვთხოვეთ, რომ თავი შეეკავებინათ. თორემ ზღვა ხალხი იქნებოდა, ხალხს ვერ დაიტევდა გუდამაყარი", — ამბობს წიკლაური.

ლაშა ბექაური 28 ივლისს ტოკიოს ოლიმპიური თამაშების გამარჯვებული გახდა.

მალზახ წიკლაური

ფოტო: დუშეთის მუნიციპალიტეტი