თალიბანმა პანჯშირის ხეობაში, რასაც ჯერჯერობით ვერ აკონტროლებენ, ასობით მებრძოლი გაგზავნა. ამის შესახებ ინფორმაციას Aljazeera ავრცელებს. თუმცა, ხეობაში მათი ქმედებების შესახებ ინფორმაცია ჯერჯერობით არ ვრცელდება.

პანჯშირის ხეობას, რომელიც ქაბულიდან ჩრდილო-აღმოსავლეთით 90 კილომეტრის დაშორებით მდებარეობს, ავღანეთისთვის ისტორიული და სტრატეგიული მნიშვნელობა აქვს — თავის დროზე ამ ხეობაში ჩამოყალიბდა ეროვნული ანტითალიბანური მოძრაობა, რომელსაც სათავეში სამხედრო მეთაური აჰმად მასუდი ედგა. დღესაც ეს ხეობა ანტითალიბანურ საყრდენს წარმოადგენს. აქ მოიყარეს თავი ანტითალიბანურმა ძალებმა და მათ შორის არის აჰმად მასუდის შვილი, აჰმად მასუდი. The Washington Post-ის ინფორმაციით, თალიბანის მოწინააღმდეგეთა გაერთიანებას სათავეში უდგანან ავღანეთის ვიცე-პრეზიდენტი, ამრულაჰ სალეჰი და უმცროსი აჰმად მასუდი.

ორშაბათს, 16 აგვისტოს, თალიბანის სპიკერმა, ზაბიჰულაჰ მუჯაჰიდმა განაცხადა, რომ საკითხის მოგვარება მშვიდობიანი მოლაპარაკებების გზით სურთ. ამასთანავე, აჰმად მასუდმა, რომელიც თალიბანის მოწინააღმდეგე ძალებს უდგას სათავეში, Aljazeera-სთან ინტერვიუში თქვა, რომ იმედს იტოვებს ისინი შეძლებენ მშვიდობიან მოლაპარაკებებს, თუმცა მისი სამხედრო ძალები ბრძოლისთვის მზად არიან.

"ჩვენ გვსურს, თალიბანმა გააცნობიეროს, რომ წინსვლის ერთადერთი საშუალება მოლაპარაკებაა. ჩვენ არ გვინდა ომის დაწყება", — ამბობს მასუდი.

აჰმად მასუდი

ფოტო: Mohammad Ismail / Reuters

აჰმად მასუდი ქაბულში ინკლუზიურ, მრავალფეროვან მთავრობას მოითხოვს, რომელიც ავღანეთის სხვადასხვა ეთნიკური ჯგუფების მიერ იქნება წარმოდგენილი. მისი თქმით, ტოტალიტარული რეჟიმი არ უნდა იყოს აღიარებული საერთაშორისო საზოგადოების მიერ.

ავღანეთის კონფლიქტის შესახებ დამატებითი ინფრომაციისთვის გაეცანით On.ge-ს მასალებს:

ფოტო: AP