სახელმწიფო მინისტრი, თეა ახვლედიანი, რუხის რესპუბლიკურ საავადმყოფოში აიცრა. უწყების ინფორმაციით, მინისტრმა სინოფარმის ვაქცინა გაიკეთა. ახვლედიანმა მოქალაქეებს, განსაკუთრებით კი ოკუპირებულ აფხაზეთში მცხოვრებ მოსახლეობას ვაქცინაციისკენ მოუწოდა.

"დღეს მე ავიცერი, როგორც ჩემი საკუთარი, ასევე ჩემი გარშემომყოფთა უსაფრთხოებისთვის, რაც არის ერთადერთი გზა მსოფლიოში დღესდღეობით, რომ დავიცვათ ერთმანეთი და დავამარცხოთ პანდემია. მინდა, მოვუწოდო გამყოფი ხაზის ორივე მხარეს მცხოვრებ მოსახლეობას, ისევე, როგორც სრულიად საქართველოს, რომ ავიცრათ ერთმანეთისთვის", — განაცხადა თეა ახვლედიანმა.

ოკუპირებული აფხაზეთიდან გადმოსული მოქალაქეებისთვის ვაქცინაცია რუხის რესპუბლიკურ საავადმყოფოში რეგისტრაციის გარეშეა ხელმისაწვდომი. კლინიკაში კი კორონავირუსის საწინააღმდეგო აცრის ჩატარება ქვეყანაში არსებული ოთხივე ვაქცინით არის შესაძლებელი.