ციანიდის საქმესთან დაკავშირებით, პროკურორები და ადვოკატები დეკანოზ გიორგი მამალაძის დაკითხვიდან რამდენიმე წითის წინ გამოვიდნენ. დაკითხვა თითქმის ათი საათის განმავლობაში გრძელდებოდა.

პროკურორ ჯარჯი წიკლაურის თქმით, ბრალდებულმა ვერცერთ მნიშვნელოვან შეკითხვას ვერ გასცა პასუხი და განაცხადა, რომ დეკანოზის თქმით, ის ფრაზები, რაც ფარულ ვიდეომასალაში ისმის, უბრალოდ ხუმრობა იყო:

"დღეს, ცალსახად შეგვიძლია განვაცხადოთ რომ ჩვენს მიერ დასმულ ვერცერთ მნიშვნელოვან შეკითხვას ვერ გასცა მან პასუხი. მისი ნაამბობი წინააღმდეგობაში მოდის, საქმეში არსებულ მტკიცებულებებთან და ასევე იმ ჩანაწერებთან, რომელიც ჩვენ გავასაჯაროვეთ. ეს არის მისი უსუსური ქმედება სხვას დააბრალოს ბრალდება. დაკითხვის პროცესში ეს ადამიანი ცდილობდა სხვისთვის დაებრალებინა ყველაფერი და ამბობს რომ პროვოკაცია მოაწყვეს მის წინააღმდეგ. იმდენად აბსურდულია მისი ჩვენება, როგორ შეიძლება ამის გამოქვეყნებაზე საუბრობდნენ ადვოკატები. თავიდან ბრალდებულმა განაცხადა, რომ იგი ოქრომჭედლისთვის ეძებდა ციანიდს. შემდეგ, ახალი ვერსია შემოგვთავაზა, რომ თითქოს, ამ ციანიდით შორენა თეთრუაშვილი აპირებდა თვითმკვლელობას. დღეს, როცა ყველა ადამიანი გაეცნო ვიდეოჩანაწერებს უკვე ახალი ვერსია მოიფიქრა ბრალდებულმა და იგი აღნიშნავს, რომ ყველა ეს ტერმინი, რაზეც ის საუბრობს, რაც ვიდეოშია, იყო ხუმრობა".