დეკანოზი ზაზა თევზაძე აცხადებს, რომ მნიშვნელოვანია, საპატრიარქომ გარკვევით გამოხატოს თავისი პოზიცია ვაქცინაციასთან დაკავშირებით. ის ამბობს, რომ საპატრიარქოს განცხადებები ამ საკითხზე მისთვის ბუნდოვანია. ჟურნალისტის კითხვას, აქვს თუ არა ვაქცინაციასთან დაკავშირებული განწყობების ფორმირებაში მნიშვნელობა საპატრიარქოს პოზიციას, დეკანოზმა ასე უპასუხა:

"მე ვფიქრობ, აუცილებლად მნიშვნელოვანია. დღეს ყველაზე მეტად სჭირდება საპატრიარქოს ხმა ჩვენს საზოგადოებას და მან გარკვევით უნდა გამოხატოს ეს პოზიციები. ჩემთვის ბუნდოვანია და ალბათ, ბევრისთვის, როდესაც ამბობენ, რომ ჩვენ არ გვაქვს უფლება რაღაც მოვუწოდოთ. აქ არის იმის თაობაზე ლაპარაკი, რომ ილაპარაკონ არა მედიცინის კომპეტენციებიდან, არამედ ვაქცინაციის მორალური, ზნეობრივი და რელიგიური მნიშვნელობიდან, რომელიც არავითარ წინააღმდეგობაში არ მოდის ქრისტიანულ მოძღვრებასთან. მეტიც, რა თქმა უნდა, დგას ქრისტიანობის სამსახურში იმიტომ, რომ ემსახურება სიცოცხლის დაცვას".

დეკანოზი ზაზა ფიქრობს, რომ ანტივაქსერული კამპანია რუსეთიდანაა მართული და ემსახურება ჩვენი საზოგადოებისა და საზელმწიფოებრიობის დასუსტებას.

"ჩვენ ვიმყოფებით ჰიბრიდულ ომში. არა მგონია ეს განწყობები, ეს ანტივაქსერული განწყობები, რომელიც ჩვენს ქვეყანაში ფეხმოკიდებულია, ადგილობრივი ნიადაგიდან იყოს აღმოცენებული. მსგავს პროცესების ინსპირაციას ხელს უწყობს ჩვენი ჩრდილოელი მეზობელი გარკვეული მოსაზრებით, იმ თვალსაზრისით, რომ დასუსტდეს ჩვენი საზოგადოება, ჩვენი სახელმწიფოებრიობა", — განაცხადა ზაზა თევზაძემ TV პირველის ეთერში.

უფრო მეტიც, ის ფიქრობს, რომ საქართველოს მართლმადიდებელ ეკლესიაში არიან ჯგუფები, რომელიც ამ ჰიბრიდულ ომში არიან ჩართულები.

"მე მეტსაც გეტყვით, საქართველოს ეკლესიაში არსებობს სამღვდელოების გარკვეული ნაწილი, საკმაოდ კარგად ორგანიზებული, მაგალითად, დავასახელებ ერთ-ერთს, ეს არის მართლმადიდებელ მშობელთა კავშირი, რომელიც ათეულობით სამღვდელო პირს მოითვლის და ისინი მკაფიოდ და ცალსახად ანტივაქსერები არიან და საკმაოდ დიდი გავლენით სარგებლობენ საზოგადოებაში და საპატრიარქოშიც, მათ შორის.

ეს უკვე ისეთი საკითხია, რომელიც კარგად უნდა გადაისინჯოს და კარგად უნდა იქნას შესწავლილი. იმიტომ, რომ რა ხდება, რანაირად და საიდან იღებს ეს ყველაფერი სათავეს, დარწმუნებით ამაზე ჩემნაირი ადამიანები ვერ ისაუბრებენ. მე მხოლოდ გონივრულ და არგუმენტირებულ ეჭვს გამოვთქვამ ამის თაობაზე, რომ ეს პროცესი გარკვეულად მართულია და რაღაც გარკვეულ ძალებს აწყობს ჩვენთან მსგავსი მძიმე მდგომარეობის ასეთი სახით დამძიმება", — განაცხადა დეკანოზმა ზაზამ TV პირველის ეთერში.

გაიგე მეტი:

• უმნიშვნელოვანესი გადაწყვეტილება, რაც ადამიანმა უნდა მიიღოს, დროული ვაქცინაციაა — ზაზა თევზაძე