ორსულებისთვის მეანგინეკოლოგებით დაკომპლექტებული ონლაინკლინიკა შეიქმნება. ამასთან, ექიმთან ნებისმიერი მიზეზით მისულ ორსულებს ტესტირებას შესთავაზებენ, მიუხედავად იმისა, აქვთ თუ არა მათ კორონავირუსის სიმპტომები. ამის შესახებ დღეს ჯანდაცვის მინისტრის მოადგილემ, თამარ გაბუნიამ განაცხადა, თუმცა ცვლილებების ამოქმედების თარიღი არ დაუკონკრეტებია.

"ბოლო პერიოდში ორსულების გარდაცვალების რამდენიმე შემთხვევა დაფიქსირდა, რაც უკიდურესად საგანგაშოა. დღეს დილით მეანგინეკოლოგების ასოციაციის წარმომადგენელთან გვქონდა შეხვედრა და შევთანხმდით, რომ ორსულთა მეთვალყურეობის პროცესში კოვიდის საწინააღმდეგო მეთოდების ჩართვა კიდევ უფრო გააქტიურდება. თუ ორსული სადმე მივა ნებისმიერი მიზეზით სამედიცინო კვლევაზე, მნიშვნელოვანია, მას კოვიდტესტირება შევთავაზოთ, მიუხედავად იმისა, ექნება თუ არა სიმპტომი. ასევე ვმუშაობთ იმაზე, რომ ცალკე ონლაინკლინიკა გაკეთდეს, სპეციალურად დაკომპლექტებული მეანგინეკოლოგებით, რომლებიც კოვიდინფიცირებულ ორსულებს კონსულტაციას ბინაზე გაუწევენ", — აცხადებს თამარ გაბუნია.

20 აგვისტოს მონაცემებით, საქართველოში კორონავირუსის 4 743 ახალი შემთხვევა დადასტურდა, გამოჯანმრთელდა 3 393, ხოლო გარდაიცვალა — 59 ადამიანი. ბოლო დღეების განმავლობაში ორსულებს ფაიზერით აცრის რეკომენდაციებს აძლევენ. თუმცა, აქცენტი კეთდება იმაზე, რომ აცრის გადაწყვეტილება მეანებმა ინდივიდუალურად უნდა მიიღონ.