რუსთავის აზოტიდან გათავისუფლებული 57 მუშა ხვალ, 14 თებერვალს სასამართლოში სარჩელს შეიტანს. ინფორმაცია ამის შესახებ On.ge-ს აზოტის პროფკავშირების წარმომადგენელმა გელა ბიჭიაშვილმა მიაწოდა.

ბიჭიაშვილის თქმით, გათავისუფლებული მუშები სამსახურში აღდგენასა და განაცდურის ანაზღაურებას მოითხოვენ. მისივე ინფორმაციით, მუშების ინტერესებს იურისტები რაისა ლიპარტელიანი და თამარ სურმავა დაიცავენ.

აღსანიშნავია, რომ რუსთავის აზოტიდან 330 თანამშრომელი გაათავისუფლეს, სასამართლოში კი მხოლოდ 57 მათგანი იდავებს. კითხვაზე, თუ რატომ შეიკავეს თავი სხვა ყოფილმა თანამშრომლებმა ბიჭიაშვილი ასე პასუხობს:

"სხვა თანამშრომლები დასთანხმდნენ შემოთავაზებულ კომპენსაციებს. 500 ლარი იყო, მაგრამ დაქვითვით 400 გამოდის. იმიტომ, რომ უაღრესად გაჭირვებულ მდგომარეობაშია ადამიანთა ჯგუფი. მათი შემოსავალი მხოლოდ და მხოლოდ არის ხელფასი, რომელიც არის ძალიან ცოტა საშუალოდ 500-600 ლარი. თითოეული მათგანს თითოეული კაპიკი აქვს გათვლილი. ზოგი ქირით ცხოვრობს, საბანკო დავალიანებები აქვთ, ოჯახები ჰყავთ და ა.შ."

ერთ თვეზე მეტია, რაც რუსთავის აზოტიდან 330 მუშა ყოველგვარი გაფრთხილების გარეშე გაათავისუფლეს.

გაიგეთ მეტი: მორიგი სოლიდარობა მუშებს და პრეტენზიები საქართველოს ბანკთან - რეპორტაჟი აქციიდან.