დეკანოზი ილია ჭიღლაძე აცხადებს, რომ დღევანდელი სიკვდილიანობა და ანტივაქსერული განწყობების მაღალი დონე მორალურად პატრიარქის, ილია მეორის კისერზეა.

"არანაირი მადლიერება საბჭოთა პატრიარქისაგან ექიმებისადმი არ ისმის, არადა ის რომ დღეს ცოცხალია მხოლოდ ექიმების და მედიცინის დამსახურებაა, თანაც ევროპული მედიცინის, გერმანიაში რამდენჯერმე იყო, ჩეხეთშიც ასევე წინა წლებში. ღმერთის იმედად თუ იყო, მაშ ნუ მიმართავდა ძვირად ღირებულ სამედიცინო მკურნალობებს და ევროპაში ნუ ივლიდა ამისთვის. დღევანდელი სიკვდილიანობა და ანტივაქსერული განწყობების მაღალი დონე საქართველოში მთლიანად ილია მეორის კისერზეა მორალურად, ისაა ის კერპი რომელსაც ჩვენი ქვეყნის მოსახლეობის 88 პროცენტი ემონება", — აცხადებს დეკანოზი.

კათოლიკოს-პატრიარქი ილია მეორე კორონავირუსის პანდემიის დროს ჯანმრთელობის პრობლემების მქონე ადამიანებს მოუწოდებს, პირველ რიგში ღმერთს სთხოვონ დახმარება. მისი განცხადება საპატრიარქომ ფერისცვალების დღესასწაულთან დაკავშრებით გაავრცელა, სადაც ილია მეორე მრევლს ამ დღესასწაულს ულოცავს. ის პანდემიაზე საუბრობს, თუმცა ერთხელაც არ ახსენებს ექიმებსა და ვაქცინას.

გარდა ამისა, ილია მეორე მღვდელმთავრებსა და ეკლესია-მონასტრების წინამძღვრებს აძლევს კურთხევას, ყოველი დიდი დღესასწაულის და ყოველი კვირის წირვის შემდეგ კოვიდით და სხვა სნეულებით დაავადებულთათვის გადაიხადონ საჯანმრთელო პარაკლისი და "უფალს და ყოვლადწმინდა ღვთისმშობელს შეავედრონ უძლურებაში მყოფი ჩვენი სულიერი შვილები".