დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, ვაქცინის მე-3 დოზაზე საუბარი საქართველოში მაშინ იქნება მიზანშეწონილი, როცა ქვეყნის მოსახლეობის დიდი ნაწილი ორჯერადად აიცრება.

"მოდით, ჯერ მესამე დოზით ნუ წავართმევთ ვაქცინას ადამიანებს, რომლებსაც ორი დოზა სჭირდებათ. კი, ვაქცინის საკმარისი რაოდენობა ჩვენთან არის და თანდათანობით შემოდის, მაგრამ ჩვენთან ამ საკითხზე, მოდით, ვისაუბროთ ოქტომბრის ბოლოს, ნოემბრის დასაწყისში. ჩემი პირადი მოსაზრებაა, რომ მესამე დოზა და ზოგადად, ბუსტერი ამ პანდემიის პერიოდში საჭირო გახდება რაღაც დრო, მაგრამ მტკიცებულება იმისა, თუ ეს იქნება 6-8-10 თვის შემდეგ, ჯერ-ჯერობით არ არის", — განაცხადა მან.

მისი თქმით, საერთაშორისო პრაქტიკისა და გამოცდილების შესაბამისად, საქართველოც მიიღებს ვაქცინის ბუსტერთან დაკავშირებით გადაწყვეტილებას, სავარაუდოდ, გვიან შემოდგომაზე.