პარტია საქართველოსთვის გუნდის ერთ-ერთი წევრის, კახაბერ ქემოკლიძის განცხადებით, მას და მის თანაგუნდელებს ძალოვანი უწყებები უთვალთვალებენ. მისი თქმით, თელავსა და გურჯაანში შეხვედრების დროს ოპერატიული ჯგუფები დაჰყვებოდათ, მათ შორის, სახელმწიფო უსაფრთხოების სამსახურის, საპატრულო პოლიციისა და შესაძლოა, კრიმინალური პოლიციის წარმომადგენლები. ამის შესახებ ქემოკლიძე Facebook-ზე წერს და ფოტო-ვიდეოს ავრცელებს.

"მეგობრებო, ვინ-ვინ და მე ყველაზე უკეთ, ვიცი თუ რას გრძნობს გულში ღირსეული ოფიცერი, მაშინ როდესაც სულელურ და არაფრის მომცემ დავალებას გაძლევენ და რაღაც გაუგონარი "არგუმენტაციით" ცდილობენ რომ გონებაში "გაგიპრავონ" ამ დავალების შესრულების აუცილებლობა. ამიტომ ფიგურალურად იმ ხალხზე, ვინც დაგვყვებოდა, საერთოდ არ გავბრაზებულვართ და არც გავბრაზდებით. დარწმუნებული ვარ, ეს ადამიანები გულში იმას ფიქრობენ, რომ ამის ნაცვლად ნეტა რამე სერიოზული, სახელმწიფოსთვის სასარგებლო, თუნდაც რისკის შემცველი საქმე გააკეთებინოს უფროსობამო... ეს ყველაფერი გავლილი გვაქვს...", — წერს ის.

ქემოკლიძის განცხადებით, პრობლემა პოლიტიკურ ხელმძღვანელობაშია, რადგან მაშინ, როცა საქართველოს უდიდესი უსაფრთხოების რისკები აქვს, ოპერატიული რესურსი გახარიას საარჩევნო შეხვედრებზე სცდება.

"ეს არის უბრალოდ სამწუხარო, დიდი სირცხვილი და ფულის, დროის და ოპერატიული რესურსების უაზროდ ფლანგვა... ამიტომ, მეგობრებო იცოდეთ, რომ ჩვენ ამ ყველაფერს ვხედავთ და უკვე ვრეაგირებთ!“, — წერს ქემოკლიძე.