შრომის ინსპექციის ინფორმაციით, აჭარაში ბოლო დღეების განმავლობაში 10-მდე ობიექტი დალუქეს, ხოლო 30-მდე ფიზიკური და იურიდიული პირი დააჯარიმეს.

"აკრძალულ ეკონომიკურ საქმიანობაზე ზედამხედველობის პროცესში შრომის ინსპექციის სამსახურთან ერთად შსს-ს კრიმინალური და საპატრულო პოლიცია, შემოსავლების, სურსათის უვნებლობის და ადგილობრივი მუნიციპალური საზედამხედველო სამსახურები არიან ჩართულები. ისინი კონტროლს მთელი ქვეყნის მასშტაბით უზრუნველყოფენ", — აცხადებენ ინსპექციაში.

საკოორდინაციო საბჭოს გადაწყვეტილებით, დღეს, 14 აგვისტოდან მუნიციპალური ტრანსპორტის მოძრაობა 4 სექტემბრამდე იზღუდება. შეზღუდვა არ ეხება საქალაქთაშორისო ტრანსპორტს.

ტრანსპორტის შეზღუდვის პირობებში, ვაქცინაციის დიდ ცენტრებამდე მოქალაქეების გადაყვანა პეციალური ტრანსპორტით მოხდება.

მომავალი სამ კვირის განმავლობაში იმოქმედებს სხვა შეზღუდვებიც. კერძოდ:

  • სრულად იზღუდება ფესტივალები, მასობრივი ღონისძიებები, კონცერტები და სპორტული შეჯიბრებები, გარდა იმ სპორტული შეჯიბრებებისა, რომელიც იმართება საერთაშორისო ეგიდით;
  • იზღუდება ბავშვთა გასართობი ცენტრების მუშაობა;
  • კვების ობიექტების მუშაობა, ნაცვლად ღამის 00:00 საათისა, დასაშვები იქნება 23:00 საათამდე;
  • საჯარო უწყებებს ეძლევათ დავალება, მაქსიმალურად გადაიყვანონ თანამშრომლები მუშაობის დისტანციურ რეჟიმზე და ანალოგიური რეკომენდაციით მიმართეს კერძო სექტორს.