ფეხბურთელი აჩი არველაძე მის პოლიტიკაში მოსვლას და გახარიას მიერ თბილისის მერობის კანდიდატად დასახელებას უარყოფს და ამბობს, რომ გახარია მან გურიაში ყოფნისას შემთხვევით გაიცნო. პარტიის პრეზენტაციაზე ყოფნაზე კი ამბობს, რომ სტუმრის სტატუსით იყო და დასძენს, შვილის ქორწილში რომ დავეპატიჟებინე, ხომ მივიდოდი.

არველაძე ამბობს, რომ ის გახარიას ორჯერ შეხვდა და აქედან ერთხელ პარტიის პრეზენტაციზე, რომელიც, მისივე თქმით, მეორე შეხვედრა იყო და პირველად ის გურიაში ყოფნისას გაიცნო, მაგრამ დროს არ აკონკრეტებს. მისი თქმით, მას გურიაში მოცვის პლანტაცია აქვს და ამ პლანტაციის საკითხზე ოზურგეთის მერიაში იმყოფებოდა, როდესაც უთხრეს, რომ გახარიას მისი ნახვა ძალიან უნდოდა და შეხვდა. თუმცა, აცხადებს, რომ გახარიას მისთვის არაფერი შეუთავაზებია. მათი შეხვედრის შემდეგ კი სოციალურ ქსელებში ფოტოები დაიდო, რაზეც მისი მერობის კანდიდატობაზე დაიწყო მედიამ საუბარი. ამასთან, ამბობ, რომ გახარიამ მასზე კარგი შთაბეჭდილება მოახდინა და მიმართ პატივისცემით არის განწყობილი.

"სოციალური ქსელიდან, როგორც გვჩვევია, პირდაპირ გამაქანეს ქალაქის მერად. მერი არა ვარ მე? სადაც მინდა, მივდივარ, სადაც მინდა, მოვდივარ, როცა მინდა, ვდგები, როცა მინდა, ვწვები, რასაც მინდა, ვჭამ, რასაც მინდა, ვსვამ. ჩემი მერობა არის, რომ გურიიდან თბილისამდე რამდენი სოფელიცაა, ერთის გამოტოვებით, დავაკაკუნებ და გამიღებენ კარს და მეტყვიან, შემოდიო. არც მანამდე მდომებია, არც ახლა არ მინდა პოლიტიკა. როგორ შეიძლება, რომ გინდოდეს? ამის შემხედვარე, რაც ჩვენ გარშემო ხდება, როგორც ესენი ლანძღავენ ერთმანეთს, როგორი ზიზღით, რატომ უნდა მინდოდეს?" — ამბობს აჩი არველაძე მაესტროს ეთერში.

აჩი არველაძე გახარიას მიერ თბილისის მერობის შესაძლო კანდიდატად დასახელების შესახებ ინფორმაცია ცოტა ხნის წინ გავრცელდა. თავად გახარიას გუნდში ამაზე პირდაპირ კომენტარს არ აკეთებდნენ.