ევროპული საქართველოს ინიციატივით, საჭიროა საჯარო, სამედიცინო, განათლების, სავაჭრო და სატრანსპორტო სფეროში დასაქმებული მოქალაქეების სავალდებულო ვაქცინაცია ან სისტემატური ტესტირება, ასევე, მასობრივი ვაქცინაციისთვის მობილური(მოძრავი) ჯგუფების შექმნა ქალაქებსა და სოფლებში მთელი საქართველოს მასშტაბით.

ისინი მოუწოდებენ მთავრობას, რომ დაწესდეს ვაქცინირებული მოქალაქეებისთვის წამახალისებელი შეღავათები, ვაქცინირებული მასწავლებლები კი საშემოსავლო გადასახადისგან სამი თვით გათავისუფლდნენ.

"სამწუხაროდ, ჯერჯერობით ბევრი ზომა არის არაეფექტური მათ შორის ყველაზე მეტი, ეს არის ვაქცინაციის ტემპები, საინფორმაციო კამპანია, მენეჯმენტი, საწოლების რაოდენობა და სხვა, რაზეც ყოველდღიურად არის საუბარი. ჩვენ დღეს მოვუწოდებთ ხელისუფლებას, რომ ჩვენი მიერ მიწოდებული სისტემა დაამუშავოს და აამოქმედოს, რითაც მოქალაქეები დაიცავენ როგორც საკუთარ თავს, ასევე სხვების ჯანმრთელობას", — ამბობს გიგი წერეთელი.

ევროპული საქართველოს ერთ-ერთი ლიდერის, ვახტანგ კალოიანის თქმით, ამ ყველაფრის განხორციელება აუცილებელია სწრაფად, წინააღმდეგ შემთხვევაში დაკარგული თვეების გამო ქვეყანაში ისევ გაგრძელდება ინფიცირებულთა და გარდაცვლილთა რაოდენობის ზრდა.