ეკონომიკისა მინისტრი, ნათია თურნავა ამბობს, რომ პრემიერმინისტრსა და ჯანდაცვის მინისტრს შორის სავარაუდო დაპირისპირება "ყურით მოთრეული თემაა". ასე უპასუხა მან ჟურნალისტის კითხვას, ეკატერინე ტიკარაძის მთავრობის წევრებისადმი მიმართვა და რეკომენდაციების დაცვისკენ მოწოდება, ხომ არ მიემართებოდა პირადად ირაკლი ღარიბაშვილს და ხომ არ ნიშნავს ეს, გუნდში დაპირისპირებას.

"ეს თქვენი ინტერპრეტაციაა. მე ასე ნამდვილად არ აღვიქვამ. ჩვენ ძალიან კარგი კოლეგიალური ურთიერთობები გვაქვს. ახლაც მიმდინარეობს საბჭო, რომელიც ეხება პანდემიის მართვას და ყველაფერს ვწყვეტთ კოლეგიალურად.

არანაირი დაპირისპირება არ არსებობს. დაპირისპირება, ეს არის ყურით მოთრეული თემა. ეს არის მოგონილი თემა იმისთვის, რომ თითქოს რაღაც ხდება. არაფერი ხდება", — განაცხადა ნათია თურნავამ.

გუშინ, 8 აგვისტოს, ეკატერინე ტიკარაძემ მთავრობის წევრებს მიმართა, დაიცვან რეკომენდაციები. ტიკარაძეს არ დაუკონკრეტებია, გულისხმობს თუ არა პრემიერმინისტრს, რომელმაც რეკომენდაციების დარღვევით იქეიფა, თუმცა ხაზგასმით აღნიშნა, რომ ეს არ არის მხოლოდ "რეკომენდაციები რეკომენდაციებისთვის" და ქვეყანა რთულ ბრძოლაშია.

ერთი დღით ადრე, 7 აგვისტოს, ირაკლი ღარიბაშვილმა ხალხმრავალ სივრცეში იქეიფა. სოციალურ ქსელში გავრცელებულ ვიდეოებში ჩანს, რომ სივრცეში არ არის დაცული სოციალური დისტანცია, შეკრებილები არიან პირბადის გარეშე და ირღვევა სხვა რეკომენდაციებიც.

რეკომენდაციების დარღვევით ქეიფის მეორე დღეს ღარიბაშვილმა კორონავირუსის საწინააღმდეგო ვაქცინა გაიკეთა. აცრის შემდეგ ჟურნალისტებთან საუბრისას აღმოჩნდა, რომ ღარიბაშვილს პრობლემად არ მიაჩნია მისივე დაწესებული რეკომენდაციების დარღვევა.

"მერე რა, რომ ვქეიფობდი? დანაშაულია ქეიფი?" — ასე უპასუხა მან ჟურნალისტის კითხვას, უქმნის თუ არა უხერხულობას რეკომენდაციების დარღვევა.

გაიგე მეტი: