კულტურის მინისტრი თეა წულუკიანი ამბობს, რომ შალვა ამირანაშვილის სახელობის ხელოვნების სახელმწიფო მუზეუმის ოქროს ფონდის ნაწილში საქართველოს საპატრიარქოსთან მუშაობენ და ოქროს ფონდი ეკლესიასთან "ორმაგ მზრუნველობაშია". წულუკიანის თქმით, ექსპონატების გადაადგილების პროცესი ნოემბერ-დეკემბრამდე არ დაიწყება.

"ოქროს ფონდის ნაწილში ვმუშაობთ საპატრიარქოსთან იმიტომ, რომ ეს ამ დიდი მუზეუმის ერთი და ალბათ, ყველაზე მნიშვნელოვანი ნაწილია, რომელიც ორმაგ მზრუნველობაშია ეკლესიასთან. ერთად შევარჩევთ შესაბამის სივრცეს. ასეულ ათასობით ექსპონატი დროებით სივრცეში გადაბრძანდება. მე არ ვვარაუდობ, რომ ექსპონატების გადაადგილების პროცესი ნოემბერ-დეკემბრამდე დაიწყება, იმიტომ, რომ სივრცეებსა და ინვენტარიაზაციას დრო სჭირდება", — განაცხადა წულუკიანმა იმედის ეთერში.

მისივე თქმით, როდესაც ექსპონატები დაბინავდება, შენობის აღდგენის კონსტრუქციული პროექტი მზად უნდა იყოს, რომელზეც ძეგლთა დაცვის ეროვნული სააგენტო მუშაობს.

4 ივლისს კულტურის მინისტრმა, თეა წულუკიანმა საზოგადოებას ამცნო, რომ შალვა ამირანაშვილის სახელობის ხელოვნების სახელმწიფო მუზეუმის შენობის გაძლიერება "რენტაბელური" არ იქნებოდა. მინისტრის ამ განცხადებას პროტესტის ტალღა მოჰყვა.

რამდენიმედღიანი გაურკვევლობისა და კრიტიკის ტალღის შემდეგ, წულუკიანი შენობის რესტავრაციას გეგმავს და გვარწმუნებს, რომ სახელმწიფოს მიზანი თავიდანვე სწორედ ეს იყო.

გაიგე მეტი: