მთავრობა ამბობს, რომ 2024 წლის ბოლომდე 13 000 იძულებით გადაადგილებულ ოჯახს ბინით უზრუნველყოფს. მათი განცხადებით, დევნილებს შეუსყიდიან 8 000-მდე ბინას, 5 000-მდე ოჯახს კი — სოფლად სახლს.

ჯანდაცვის მინისტრმა, ეკატერინე ტიკარაძემ და დევნილთა სააგენტოს დირექტორმა, ბესარიონ სიმონიშვილმა ისაუბრეს იმაზე, რომ ბევრი დევნილი დღემდე არასათანადო პირობებში ცხოვრობს. აღსანიშნია, რომ აფხაზეთის ომიდან 28 წლის შემდეგაც იძულებით გადაადგილებულ პირთა დიდი ნაწილი ბინისა და სახელმწიფოს დახმარების მოლოდინშია, ნაწილი ამ დრომდე სხვადასხვა შენობაშია შესახლებული და გაუსაძლის პირობებში ცხოვრობს.

მთავრობის გეგმის მიხედვით, 2024 წლის ბოლომდე თბილისში 3 300 ბინა უნდა აშენდეს, ზუგდიდსა და ქუთაისში — 1 700, ხოლო რუსთავში — 833. ეკონომიკის მინისტრის განცხადებით, ჯამში 700 მილიონ ლარზე მეტი დაიხარჯება.

მინისტრების განმარტებით, ბინებით უზრუნველყოფას შემდეგი გეგმით აპირებენ:

  • მასშტაბური მშენებლობები რეგიონებში;
  • მენაშენეების პროექტი — მენაშენეთა კომისიის ფარგლებში თბილისსა და რეგიონებში დევნილებისთვის ახალაშენებულ საცხოვრებელ კორპუსებში ბინები უნდა შეისყიდონ;
  • სოფლად სახლის შესყიდვის პროექტი, რომლის მიხედვით, იძულებით გადაადგილებული ოჯახი მისთვის სასურველ საცხოვრებელ სახლს საქართველოს ნებისმიერ რეგიონებში თვითონ ირჩევს;
  • საცხოვრებელი ფართების დაკანონება.

დევნილთა სააგენტოს დირექტორის ინფორმაციით, 2013 წლიდან დღემდე ახალი საცხოვრებელი სახლი ჯამში 23 000 დევნილ ოჯახს გადაეცა.