15 წლის ლუკა სირაძის თვითმკვლელობის საქმეზე ჩვენების მიცემის იძულებაში ბრალდებით დაკავებული გამომძიებელი, მარიანა ჩოლოიანი გაათავისუფლეს. ინფორმაცია ამის შესახებ ჩოლოიანის ადვოკატმა, გაგი მოსიაშვილმა მთავარ არხს დაუდასტურა.

"მიუხედავად იმისა, რომ მარიანა ჩოლოიანი აკმაყოფილებდა კანონით გაწერილ იმ კრიტერიუმებს, რომელიც წინაპირობა არის ხოლმე საპატიმრო სასჯელის შეცვლის, ადგილობრივმა საბჭომ უარი თქვა მის გათავისუფლებაზე. ამის შემდეგ, ჩვენ, დაცვის მხარემ ჩოლოიანის მიმართ ადგილობრივი საბჭოს მიერ გაცემული უარი გავასაჩივრეთ ადმინისტრაციული წესით სასამართლოში.

საქალაქო სასამართლოს ადმინისტრაციულ საქმეთა კოლეგიის სასამართლომ განიხილა ჩვენი დასაბუთებული საჩივარი, დააბრუნა უკან ადგილობრივს საბჭოს ხელახალი განხილვისათვის, სწორედ ამის შემდგომ მარიანა ჩოლოიანი გათავისუფლდა", — განაცხადა მან.

ჩოლოიანის გათავისუფლებას გამოეხმაურა ლუკა სირაძის ძმაც, რომელმაც აღნიშნულს ფორმულასთან საუბრისას მიუღებელი და დამცინავი უწოდა.

"ადამიანმა, რომელმაც ასეთი დანაშაული ჩაიდინა, იმის მაგივრად, რომ ბრალი დამძიმებოდა, რისთვისაც ჩვენ ამდენი ხანია ვიბრძვით, ასე უცებ ციხიდან გამოუშვეს, ყველაფრის გარეშე. ვიცით, რომ არ არიან ანგარიშვალდებულები ჩვენ ჩაგვაყენონ საქმის კურსში, თუმცა ასე დამცინავად მართლა მისი ციხიდან გამოშვება არ შეიძლებოდა.

ძალიან დიდი გამოხმაურება მოჰყვა ამ საქმეს, ძალიან ბევრი მოწმე იყო იმისთვის, რომ ის ციხეში ჩაგვესვა, ძალიან ბევრი ვიბრძოლეთ მაგისთვისაც და ასე უცებ ადგე და წელიწადნახევარში გაათავისუფლო ადამიანი, რომელმაც ასეთი დანაშაული ჩაიდინა, არის მიუღებელი და გარღვევაა ჩემი აზრით სამართალში, არ არის სამართლიანი", — განაცხადა მან.

ჩოლოიანს ჩვენების მიცემის იძულების ბრალდებით 2020 წლის სექტემბერში 3 წლით თავისუფლების აღკვეთა მიუსაჯეს.

15 წლის ბიჭი, რომელიც დაკითხვის შემდეგ კორპუსიდან გადმოხტა გასული წლის 2019 წლის 17 დეკემბერს გარდაიცვალა. ახალგაზრდა იურისტთა ასოციაციის განცხადებით, არასრულწლოვანმა თვითმკვლელობა, საგამოძიებო ორგანოს თანამშრომლების მხრიდან ფსიქოლოგიური ძალადობის გამო სცადა.

პოლიციას გამოძიების დაწყების მოთხოვნით მწვანე სკოლამ მიმართა, რომლის ტერიტორიაზეც გვიან ღამით არასრულწლოვანმა სხვადასხვა წარწერები დატოვა. გავრცელებული ინფორმაციით, ეს 15 წლის ლუკა სირაძემ გააკეთა, რომელიც მწვანე სკოლის ყოფილი მოსწავლე იყო.

საიას ინფორმაციით, დაკითხვაზე ლუკა სირაძე ყოფილ თანაკლასელს დააპირისპირეს და მასზე ფსიქოლოგიურად იძალადეს, რის შემდეგაც ის მეცხრე სართულიდან გადმოხტა. რამდენიმე დღის განმავლობაში ის კომატოზურ მდგომარეობაში იყო.

შინაგან საქმეთა სამინისტრო ამტკიცებდა, რომ ბავშვი მშობელთან ერთად გამოკითხეს და ფსიქოლოგიური ძალადობას ადგილი არ ჰქონია. მათ გამოძიება თვითმკვლელობამდე მიყვანის მუხლით დაიწყეს. გამოძიებას სწორედ ის განყოფილება აწარმოებს, სადაც არასრულწლოვანზე, სავარაუდოდ, ფსიქოლოგიურად იძალადეს.

სახელმწიფო ინსპექტორის აპარატმა კი გამოძიება სისხლის სამართლის კოდექსის 335-ე მუხლით დაიწყო, რაც ჩვენების მიცემის იძულებას გულისხმობს. მოზარდის გარდაცვალების შემდეგ ამ საქმეზე გამომძიებელი მარიანა ჩოლოიანი დააკავეს და 2 სამართალდამცავს უფლებამოსილება დროებით შეუჩერეს.

ვინ არის მარიანა ჩოლოიანი

საქართველოს ახალგაზრდა იურისტთა ასოციაციის ინფორმაციით, მარიანა ჩოლოიანი ფიგურირებს 2011 წლის 26 მაისს ე.წ. ყინწვისის სპეცოპერაციის დროს დაკავებული ნიკოლოზ გოგუაძის საქმეში.

ორგანიზაციის განცხადებით, გოგუაძე 2011 წლის 26 მაისს, ე. წ. ყინწვისის სპეცოპერაციის დროს, ყინწვისის სამონასტრო კომპლექსის მიმდებარე ტერიტორიაზე დააკავეს. როგორც საიაში ამბობენ, დასჯისა და აღიარებითი ჩვენების მოპოვებისთვის გოგუაძეზე იყო როგორც ფიზიკური, ისე ფსიქოლოგიური ძალადობა.

ორგანიზაციის განცხადებით, ჩოლოიანმა სასამართლოში ძალადობა უარყო. ამავე დროს, კი 2019 წელს ადამიანის უფლებათა ევროპულმა სასამართლომ არასათანადო მოპყრობა დადგენილად მიიჩნია.