კულტურის მინისტრის, თეა წულუკიანის განცხადებით, შალვა ამირანაშვილის სახელობის ხელოვნების სახელმწიფო მუზეუმში განთავსებული ექსპონატების შესანახად ორ ახლომდებარე სივრცეს განიხილავენ. მისი განცხადებით, საზოგადოებას ამის შესახებ ინფორმაციას 5 აგვისტომდე გააცნობენ.

"სად უნდა მოთავსდეს დროებითი საცავში ეს ასეულობით ათასი ექსპონატი, ჩვენ ვთქვით, რომ 5 აგვისტომდე სივრცეების იდენტიფიცირებას მოვახდენდით, მე ვვარაუდობ, რომ დღის ბოლომდე თუ არა ხვალ, ყოველ შემთხვევაში, 5 აგვისტომდე კონკრეტულ სივრცეს ჩვენ ვიტყვით, თუმცა აქვე შემიძლია გითხრათ, რომ ეს ექსპონატები შორს ვერ გადაადგილდება, განსაკუთრებით, ოქროს ფონდში არის ისეთი მდგომარეობა, რომ ზოგიერთი ექსპონატი ფიზიკურად ვერ აიტანს შორს გადაადგილებას.

ამიტომ ის ორი სივრცე, რომელზეც შეიძლება იყოს საუბარი და ამაზე, რა თქმა უნდა, დღეს-ხვალ გვაქვს ვადა და ამაზე მოგახსენებთ არ იქნება, ასე ვთქვათ, თვითონ კონკრეტული მუზეუმისგან შორს მდებარე სივრცეები, სადაც დროებითი საცავები მოეწყობა, მანამ სანამ თვითონ მუზეუმი იქნება აღდგენილი და განახლებული", — განაცხადა მან.

4 ივლისს კულტურის სამინისტრომ განაცხადა, რომ მძიმე ინფრასტრუქტურული მდგომარეობის გამო შალვა ამირანაშვილის ხელოვნების მუზეუმის ძირითადი შენობა დაიცლება. როგორც სამინისტროში თქვეს, მუზეუმი მართვის განსაკუთრებულ რეჟიმზე გადადის. მომდევნო დღეებში გავრცელდა ინფორმაცია ხელოვნების მუზეუმის დანგრევასთან დაკავშირებით, რასაც სამინისტრომ სიცრუე უწოდა და განაცხადა, რომ "სიცრუის ავტორები და მათ ზურგს ამოფარებული სხვა პირები ამ გზით საკუთარი უმოქმედობით გამოწვეული სავალალო შედეგების გადაფარვას ცდილობენ".