ეკონომიკის მინისტრის, ნათია თურნავას განცხადებით, "შეგრძნებებისა და სტატისტიკის დონეზე" ვხედავთ, რომ საქართველო მიმზიდველ ტურისტულ ბაზრად რჩება. ამის შესახებ მან მთავრობის სხდომის დასრულების შემდეგ ისაუბრა.

"შეგრძნებების დონეზე და სტატისტიკის დონეზე ვხედავთ, რომ საქართველო მიუხედავად კოვიდისა, კვლავაც რჩება ერთ-ერთ მიმზიდველ ტურისტულ ბაზრად. ძალიან ბევრი ტურისტია სხვადასხვა ქალაქში, ჩვენ ვხედავთ, რომ სასტუმროების დატვირთულობა არის 70-80%, ეს არის ძალიან მნიშვნელოვანი ინდიკატორი, ლარის სიმყარე ერთ-ერთი ასეთივე ირიბი ინდიკატორია, რომ ტურიზმი მართლაც ცოცხლდება, ვითარდება, მისი აღდგენა ხდება", — თქვა მან.

მისივე თქმით, აშშ-ს სახელმწიფო დეპარტამენტის ვებ-საიტზე მითითებული ინფორმაცია, რომელიც საქართველოში მოგზაურობას რეკომენდაციას არ უწევს, უპირველეს ყოვლისა, კოვიდშეზღუდვებს უკავშირდება, რაც პანდემიის საფრთხესთან დაკავშირებით ზოგადად მსოფლიოში არსებულ დინამიურ ვითარებას ეხება.