პლატფორმა სალამი სასწრაფო-სამედიცინო დახმარების თანამშრომლებს ეთნიკური ნიშნით დისკრიმინაციაში ადანაშაულებს. სალამის ერთ-ერთი წარმომადგენელი, ქამრან მამმადლი On.ge-სთან ამბობს რომ, გამოძახებაზე მისულმა 112-ის ექიმებმა დისკრიმინაციულად მიმართეს და უთხრეს, რომ ექიმების მიმართ ასეთი მომთხოვნები "მათ ქვეყანაში" ყოფილიყვნენ.

"28 ივლისს, საღამოს საათებში, თბილისის ცენტრალურ უბანში, პლატფორმა სალამის ოფისში ერთ-ერთი ჩვენი წევრი შეუძლოდ გახდა. მაშინვე, 18:05 საათზე გამოვიძახეთ სასწრაფო დახმარება. ქვეყანაში არსებული კოვიდ რეალობის გათვალისწინებით ერთი საათის და 5 წუთის დაგვიანებით მოვიდა სასწრაფოს დახმარების ბრიგადა (მანქანის ნომერი OO-953-VO), რომელიც მოსვლისთანავე გამოირჩეოდა აგრესიულობითა და არაეთიკურობით, რაზეც ორგანიზაციის რამდენიმე წევრმა შენიშვნა მისცა ექიმებს", — აცხადებს პლატფორმა სალამი.

მათივე თქმით, პაციენტის გასინჯვის დროს, ბრიგადის ერთ-ერთმა წევრმა მათ ჰკითხა, თუ საიდან იყვნენ.

"ჩვენი პასუხი, რა თქმა უნდა იყო, რომ ვიყავით საქართველოს მოქალაქეები და მსგავსი შინაარსის კითხვები იყო არასწორი. ექიმებმა პაციენტის გასინჯვის მიუხედავად, პაციენტის გასინჯვის ოქმი არ დაგვიტოვეს. ამასთანავავე, გარეთ გასვლის შემდეგ, ჩვენს ერთ-ერთ წევრს, რომელიც მათ გარეთ აცილება, ერთ-ერთმა ექიმმა განუცხადა: "თქვენს ქვეყანაში, რომ ჩახვალთ იქ იყავით ასეთი მომთხოვნი ექიმების მიმართ", — აცხადებენ საქართველოს ეთნიკურად აზერბაიჯანული თემის წარმომადგენლები.

ისინი ექიმისგან ბოდიშის საჯარო მოხდას ან სამსახურიდან გათავისუფლებას მოითხოვენ.

მომხდარის გასარკვევად On.ge სასწრაფო სამედიცინო დახმარების ცენტრს დაუკავშირდა. 112-ის პრესსამსახურში გვითხრეს, რომ არასამუშაო საათების გამო დღეს ვერ გვიპასუხებდნენ. მათ პასუხს მიღებისთანავე შემოგთავაზებთ.