ევროპარლამენტარი, ვიოლა ფონ კრამონი საქართველოს მმართველ და ოპოზიციურ ძალებს აკრიტიკებს. ქართული ოცნების მიერ შარლ მიშელის დოკუმენტის ანულირებასთან დაკავშირებით ის აცხადებს, რომ ქართულმა ოცნებამ ამის შესახებ ღიად განაცხადა. ის, ასევე, ტვიტერზე საქართველოს საგარეო საქმეთა მინისტრის, დავით ზალკალიანის განცხადებას აზიარებს და წერს, რომ ქვეყანაში ბოლო პერიოდში განვითარებული მოვლენების ფონზე, ზალკალიანის ინტერვიუ განსაკუთრებულად სასაცილოდ ჩანს.

"საქართველოში ბოლოდროინდელი მოვლენების ფონზე, ეს ინტერვიუ განსაკუთრებით სასაცილოდ ჩანს. ქართულმა ოცნებამ ღიად განაცხადა, რომ ევროკავშირთან დადებულ 19 აპრილის შეთანხმებაზე საკუთარ ხელმოწერას აუქმებს.

დავით ზალკალიანი: "2020 წლის შემდგომი აღმოსავლეთ პარტნიორობის დღის წესრიგთან დაკავშირებით ხედვა გვჭირდება", — წერს კრამონი ტვიტერზე.

მეორე პოსტში ის ნაციონალურ მოძრაობას აკრიტიკებს და ამბობს, რომ მოქალაქეების ხარჯზე ორივე მხარე საშინელ პოლიტიკურ თამაშს თამაშობს.

"სამართლიანი რომ ვიყო: უდიდესმა ოპოზიციურმა პარტიამ, ენმ-მ არც კი სცადა ევროკავშირთან ამ საერთო შეთანხმებისთვის ხელი მოეწერა. ასე რომ, ორივე მხარე, საკუთარი მოქალაქეების ხარჯზე, საშინელ პოლიტიკურ თამაშს თამაშობს. ეს ყველაფერი სასიკეთოდ ნამდვილად არ წაადგებათ", — წერს ევროპარლამენტარი.

ის, ასევე, წერს, რომ ახლა კიევშია და საქართველოში მოდის.

ქართულმა ოცნებამ დღეს, 28 ივლისს პოლიტსაბჭოსა და უმრავლესობის სხდომების შემდეგ ბრიფინგი გამართა, სადაც განაცხადა, რომ ოპოზიციასთან ევროკავშირის მედიაციითა და შარლ მიშელის პირადი ჩართულობით მიღწეული შეთანხმება ანულირებულია. პარტიის თავმჯდომარემ ირაკლი კობახიძემ ეს ოპოზიციას დააბრალა და თქვა, რომ შეთანხმებას მხოლოდ ისინი ასრულებდნენ, რაც არასწორია, ამიტომ დოკუმენტმა თავი ამოწურა.

გაიგე მეტი: