დეპუტატ დავით ბაქრაძის თქმით, ქართული ოცნების მიერ შარლ მიშელის შეთანხმების ანულირების შემდეგ მისი პირველი რეაქცია პარლამენტიდან გამოსვლის სურვილი იყო, თუმცა აცხადებს, რომ დროებით თავს იკავებს. იგივე პოზიცია აქვს დეპუტატს ადგილობრივი არჩევნების ბოიკოტირების შესახებ.

"რა თქმა უნდა, ჩემი პირველი ადამიანური და პოლიტიკური რეაქცია ან ნაბიჯზე გახლავთ პარლამენტის დატოვება და ადგილობრივი არჩევნების ბოიკოტირება. მაგრამ კარგად მესმის ისიც, რა საფრთხის წინაშე დგას ქვეყანა, რამხელა პასუხისმგებლობა მეკისრება, როგორც პოლიტიკოსს და ამიტომ, სხვა ოპოზიციურ ძალებთან კოორდინირების, ჩვენს ევროპელ და ამერიკელ პარტნიორებთან კონსულტაციების გარეშე, ცალმხრივად ასეთი ნაბიჯის გადადგმისგან დროებით თავს ვიკავებ, თუმცა ნამდვილად არ გამოვრიცხავ არც ერთს და არც მეორეს", — განაცხადა დავით ბაქრაძემ.

ის ამბობს, რომ საბოლოო გადაწყვეტილებას მხოლოდ საერთაშორისო პარტნიორებთან და დანარჩენ ოპოზიციასთან კონსულტაციების შემდეგ მიიღებს.

ბაქრაძე ფიქრობს, რომ ახლა, როგორც არასდროს ისეა საჭირო ოპოზიციური ერთობა. დეპუტატი აცხადებს, რომ ისედაც პოლარიზებული საზოგადოება, შეთანხმების გაწყვეტის შემდეგ სამოქალაქო და პოლიტიკური დაპირისპირების საფრთხის წინაშე დადგა.

"მრავალთვიანი პოლიტიკური კრიზისის შემდეგ, 19 აპრილის შეთანხმებამ შექმნა შესაძლებლობა, დასრულებულიყო კრიზისი, ქვეყანა გამოსულიყო უმწვავესი დაპირისპირების ფაზიდან, ამუშავებულიყო პარლამენტი და ჩვენს ევროპელ და ამერიკელ პარტნიორებთან ერთად, შეთანხმებული რეფორმების და ნაბიჯების გზით წავსულიყავით წინ. სამწუხაროდ, დღეს „ქართულმა ოცნებამ“ ეს შესაძლებლობა ოფიციალურად დაასრულა — ისედაც პოლარიზაციის და ძალადობის ჭაობში მყოფი ქვეყანა დადგა სამოქალაქო და პოლიტიკური დაპირისპირების ახალი, უმწვავესი საფრთხის წინაშე", — აცხადებს დავით ბაქრაძე.

ბაქრაძე ყურადღებას ამახვილებს იმაზეც, რომ შარლ მიშელის შეთანხმების ანულირება უარყოფითად აისახება ქვეყნის საგარეო იმიჯზე.

"ნებისმიერი ასეთი დაპირისპირება პრობლემას უქმნის ქვეყნის ევროპულ და ევროატლანტიკურ პერსპექტივას და გარდაუვლად მიაქანებს საქართველოს რუსეთისკენ, რაც ჩვენი ქვეყნის მომავლისთვის დამღუპველი სცენარია", — აცხადებს დავით ბაქრაძე.

რამდენიმეთვიანი პოლიტიკური კრიზისის შემდეგ, ევროკავშირის მედიაციითა და შარლ მიშელის პირადი ჩართულობით მიღწეული შეთანხმება ანულირებულია. ეს გადაწყვეტილება მმართველმა გუნდმა მიიღო, ბრალი კი ტრადიციულად ოპოზიციას დასდო.

ქართული ოცნების თავმჯდომარემ, ირაკლი კობახიძემ პარტიის პოლიტსაბჭოსა და უმრავლესობის სხდომის შემდეგ გამართულ ბრიფინგზე გამოაცხადა, რომ შეთანხმებას მხოლოდ ისინი ასრულებდნენ კეთილსინდისიერად, რაც არასწორია. მათი აზრით, 100 დღეში თავი ამოწურა დოკუმენტმა, რომლის გამოც შარლ მიშელი და კრისტიან დანიელსონი საქართველოს არაერთხელ ეწვივნენ და რომლის მიღებაშიც არაერთი ქვეყნის ელჩი იყო ჩართული.

გაიგე მეტი:

• შეთანხმების მოშლა ნიშნავს, რომ "ოცნება" 2024 წლის საპარლამენტო არჩევნებამდე რჩება ხელისუფლებაში — ISFED
• ძალიან სამწუხაროა, რომ ენმ-მ პირდაპირ ხელი შეუწყო ამ პროცესს — სამადაშვილი დოკუმენტის ანულირებაზე
• შეთანხმების ანულირება ადასტურებს იმას, რომ ქართული ოცნება პანიკაშია — ბოკერია
• "ოცნება" ოპოზიციას ეუბნება, მიუხედავად იმისა, რომ გავდივართ შეთანხმებიდან, ითანამშრომლეთ და ჩვენ გადავწყვეტთ, იქნება რიგგარეშე თუ არაო — მენაბდე
• ქართულმა ოცნებამ პირდაპირ გვითხრა, რომ მათ უარი თქვეს საქართველოს ევროპულ მომავალზე — გიგაური
• ლელო ადგილობრივი არჩევნების ბოიკოტს არ გამორიცხავს
• ეს არის უარის თქმა ევროპაზე, აშშ-ზე, ყველა პარტნიორზე — სამნიძე მიშელის შეთანხმების ანულირებაზე
• მე ვტოვებ პარლამენტს, იზოლაციიდან გამოსვლის შემდეგ კიდევ ერთხელ მივმართავ პარლამენტს — ჯაფარიძე