ქართული ოცნების მიერ შარლ მიშელის დოკუმენტის ანულირების შემდეგ, ლელო ადგილობრივი არჩევნების ბოიკოტს არ გამორიცხავს. ლელოს ლიდერი, მამუკა ხაზარაძე მმართველი პარტიის ამ გადაწყვეტილებას უპასუხისმგებლოს უწოდებს. მისივე თქმით, ქართული ოცნების თავმჯდომარის, ირაკლი კობახიძის ეს განცხადება დესტაბილიზაციის მცდელობა და საზოგადოების რადიკალიზაციისკენ მიმართვაა.

"ქართულმა ოცნებამ კარგად იცის მისი რეიტინგი და იმიტომ გამოვიდა ამ შეთანხმებიდან, რომ ისინი 43% ვერ დააგროვებდნენ არჩევნებში. მოვუწოდებთ საზოგადოებას და ოპოზიციურ ძალას, დავიწყოთ კონსულტაციები სასწრაფოდ.

ოპოზიციონერ პარტნიორებთან ერთად მივიღებთ გადაწყვეტილებას, რა ნაბიჯებს გადავდგამთ. თუ საჭირო იქნება, არ გამოვრიცხავ ადგილობრივი არჩევნების ბოიკოტსაც. ამ ქვეყანაში უნდა დამთავრდეს ტყუილის ტირაჟირება", — განაცხადა ხაზარაძემ.

ქართულმა ოცნებამ დღეს, 28 ივლისს პოლიტსაბჭოსა და უმრავლესობის სხდომების შემდეგ ბრიფინგი გამართა, სადაც განაცხადა, რომ ოპოზიციასთან ევროკავშირის მედიაციითა და შარლ მიშელის პირადი ჩართულობით მიღწეული შეთანხმება ანულირებულია. პარტიის თავმჯდომარემ ირაკლი კობახიძემ ეს ოპოზიციას დააბრალა და თქვა, რომ შეთანხმებას მხოლოდ ისინი ასრულებდნენ, რაც არასწორია, ამიტომ დოკუმენტმა თავი ამოწურა.

გაიგე მეტი: