საქართველოს საკონსტიტუციო სასამართლომ წელს კიდევ ერთი Toyota Camry იყიდა. სასამართლომ გამარტივებული სახით ხელშეკრულება 6 მარტს ისევ შპს ტოიოტა ცენტრ თეგეტასთან გააფორმა. კომპანიამ სასამართლოს ავტომობილი 10 მარტამდე უნდა მიეწოდებინა.

ახლაც, წინა Toyota Camry-ის შეძენის მსგავსად, 2011 წელს გამოშვებული Hyundai IX 35 იცვლება. ახალი ავტომობილის ღირებულება 55 622 ლარია, საიდანაც ნაწილი (34 622 ლარი) ფულადი სახით ანაზღაურდება, დანარჩენი 21 ათასი ლარი კი, ჩასანაცვლებელი ავტომობილის ღირებულებაა.

2016 წლის 1 დეკემბრიდან დღემდე საკონსტიტუციო სასამართლომ სულ 6 ავტომობილი შეცვალა.

საკონსტიტუციო სასამართლოში აღნიშნავენ, რომ ახალი ავტომობილები მოსამართლეებისთვის იყიდეს. ავტომობილებს შორის ყველაზე ძვირადღირებული (176 150) - Toyota Land Cruiser საკონსტიტუციო სასამართლოს თავმჯდომარეს, ზაზა თავაძეს ემსახურება. მანამდე საკონსტიტუციო სასამართლოს თავმჯდომარის სარგებლობაში ორი ავტომობილი იყო, რომელიც ერთით ჩანაცვლდა.

უწყების ინფორმაციით, ჩასანაცვლებელი ავტომობილები ამორტიზებული იყო და მათი ექსპლუატაციისთვის დიდი ხარჯის გაწევა იყო საჭირო. ახალი ავტომობილები კი, ბაზარზე ხარისხისა და ფასის შეფარდების მიხედვით ირჩევა.