სტრასბურგის ადამიანის უფლებათა სასამართლომ საქართველოს ყოფილი შინაგან საქმეთა მინისტრის, ვანო მერაბიშვილი საქმის ზეპირი განხილვა დაასრულა. გადაწყვეტილება ჯერ ცნობილი არაა.

სტრასბურგის სასამართლოს დიდი პალატის მოსამართლეებთან მოსაზრებები დააფიქსირეს ვანო მერაბიშვილის უფლებათა დამცველმა და საქართველოს წარმომადგენელმა. მერაბიშვილის უფლებების დამცველი ოთარ კახიძე ამბობს, რომ სახელმწიფოს წარმომადგენლებმა სასმართლოს არგუმენტების ნაცვლად, აღიარებითი ინფორმაცია მიაწოდა.

"მათ ვერ წარმოადგინეს ვერც ერთი ხელშესახები მტკიცებულება, რომელიც გააბათილებდა ვანო მერაბიშვილის განცხადებას ციხიდან გაყვანის თაობაზე. პირიქით, მათ სასამართლოს მიუტანეს გაურკვეველი მტკიცებულება იმის შესახებ, რომ ოთარ ფარცხალაძე კომპიუტერთან რაღაც მოქმედებებს ახორციელებდა, ოღონდ, ეს მოქმედებები დაასრულა მათივე მტკიცებით პირველ საათსა და 25 წუთზე, მერაბიშვილის გაყვანა მოხდა აქედან 20 წუთის შემდგომ," - აღნიშნა კახიძემ.

საქართველოს სახელმწიფოს წარმომდგენელი, იუსტიციის მინისტრის მოადგილე, ალექსანდრე ბარამიძე კი ამბობს, რომ მათ მყარი არგუმენტები.

"ჩვენ ძალიან დიდი იმედით ვართ განწყობილნი, რომ ამ საქმეზე კონვენციით გათვალისწინებული უფლებების დარღვევას ადგილი არ ექნება, როგორც ამას დიდი პალატა მიიჩნევს, თუმცა რა საკვირველია უნდა დაველოდოთ დიდი პალატის გადაწყვეტილებას,“-განაცხადა ალექსანდრე ბარამიძემ.

სტრასბურგის სასამართლოს დიდმა პალატამ საქმის განხილვა საქართველოს საჩივრის საფუძველზე დაიწყო. იუსტიციის სამინისტრომ ვანო მერაბიშვილის საქმეზე ამავე სასამართლოს ერთ-ერთი პალატის მიერ 2016 წლის 14 ივნისს გამოტანილი გადაწყვეტილება გაასაჩივრა. შესაბამისად, 14 ივნისს გამოტანილი გადაწყვეტილება, ჯერჯერობით, არ შედის ძალაში და არ მიექცევა აღსასრულებლად.