საქართველოს პრემიერმინისტრი, ირაკლი ღარიბაშვილი მოქალაქეებს აცრისკენ მოუწოდებს და და ამბობს, რომ "რაც გასაკეთებელი იყო, ყველაფერი გააკეთეს. ღარიბაშვილმა, ასევე, ეკონომიკის შენარჩუნებისთვის ვაქციის მნიშვნელობაზე ისაუბრა და აღნიშნა, რომ მომდევნო ჩაკეტვის შემთხვევაში ეკონომიკურად გაუსაძლისი მდგომარეობა შეიქმნება.

"ვაქცინაცია უაღრესად მნიშვნელოვანია მოქალაქეების ჯანმრთელობისთვის, მეორეს მხრივ ეკონომიკის შენარჩუნებისთვის. მეტ დაკეტვას ჩვენი ქვეყანა ვეღარ გაუძლებს. მოგვიწევს ისევ დაკეტვა, ადამიანები დაკარგავენ სამსახურს და შეიქმნება გაუსაძლისი მდგომარეობა. წინასწარ მინდა, პრევენციული განცხადება გავაკეთო. ამას დაემატება ის, რომ ქვეყანას დამატებით ვალების აღება დასჭირდება. ეს ტვირთად დააწვება ჩვენს მოქალაქეებს, ქვეყანას ზოგადად. ძალიან დამძიმდება სიტუაცია. გვაქვს ყველა რესურსი იმისთვის, რომ ვაქცინაცია რაც შეიძლება სწრაფად ჩავატაროთ და ჩვენ, დაახლოებით, 2-3 თვეში შეგვეძლება მილიონნახევარი მოქალაქის აცრა", — განაცხადა პრემიერმინისტრმა მთავრობის სხდომაზე.

მისივე თქმით, ვაქცინები არის ადგილზე იმაზე მეტი, რაც საჭიროა.

"ერთადერთი მარტივი თხოვნა გვაქვს, გთხოვთ აიცერით. თუ მთავრობას არ დაუდგა ჩვენი მოქალაქეები, ისევე, როგორც დაუდგნენ შარშან, როცა დაიწყო პანდემია, ჩვენ მარტო ვერაფერს ვერ გავაკეთებთ. რაც გასაკეთებელი იყო ყველაფერი გავაკეთეთ. ვაქცინები არის ადგილზე, იმაზე მეტი, რაც საჭიროა. კიდევ შემოვა. მოგეხსენებათ, მილიონ ნახევარი ადგილზეა და მილიონ ნახევარი გზაში არის და შემოვა სულ რაღაც რამდენიმე კვირების განმავლობაში. კიდევ ერთხელ თხოვნით მივმართავ მოქალაქეებს, რომ ჩავერთოთ ვაქცინაციის პროცესში და ჩავიტაროთ ერთი მარტივი აცრა", — თქვა მან.

20 ივლისის მონაცემებით, საქართველოში კორონავირუსის 2 616 ახალი შემთხვევა დადასტურდა, გამოჯანმრთელდა 880, ხოლო გარდაიცვალა — 26 ადამიანი.

ბოლო 24 საათში ქვეყნის მასშტაბით ჩატარდა 36 375 კვლევა ტესტით, მათ შორის, 22 825 კვლევა ანტიგენის ტესტით და 13 550 PCR ტესტით.

პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 390 945-ს, ჯამში გამოჯანმრთელებულთა რაოდენობა გაიზარდა 367 130-მდე, ხოლო ვირუსს ჯამში 5 592 პირი ემსხვერპლა.