მიმდინარე წლის 1-ლი აგვისტოდან საგადასახადო კანონმდებლობაში ცვლილებები შედის, რომლის მიხედვითაც, ადგილობრივ ფიზიკურ პირებს, booking.com-ით ბინის გაქირავების შემთხვევაში, დღგ-ის გადახდა მოუწევთ — არამეწარმე ფიზიკურმა პირებმა დამატებით პლატფორმაზე განთავსებისთვის გაცემული საკომისიოს 18% უნდა გადაიხადონ.

ამ თემასთან დაკავშირებით განცხადება გაავრცელა შემოსავლების სამსახურმაც, სადაც უწყებამ განმარტა, რომ დამატებული ღირებულების გადასახადით (დღგ) იბეგრება არა ბინის ქირის მთლიანი მოცულობა, არამედ Booking.com-ის მიერ ფიზიკური პირებისთვის გაწეული მომსახურების საკომისიოს თანხა.

"საქართველოს ფინანსთა სამინისტროს შემოსავლების სამსახური ეხმაურება გარკვეული მედია საშუალებით გავრცელებულ ინფორმაციას, რომელიც რეგისტრაციის პორტალის - BOOKING.COM-ის მიერ მომსახურების ტარიფის გადახდის ახალ პირობებს შეეხება და განმარტავს, რომ უცხოელ დასაბეგრ პირს (ამ შემთხვევაში BOOKING.COM) დღგ-ით დაბეგვრის ვალდებულება წარმოეშობათ მხოლოდ იმ ციფრული მომსახურების მიწოდებაზე, რომელსაც გაუწევენ საქართველოს ტერიტორიაზე არსებულ არამეწარმე ფიზიკურ პირებს. თვალსაჩინოებისთვის განვიხილოთ შემდეგი მაგალითი: თუ არამეწარმე ფიზიკური პირი BOOKING.COM-ზე განათავსებს ბინის გაქირავების შესახებ ინფორმაციას, უცხოელი დასაბეგრი პირი (აღნიშნულ შემთხვევაში BOOKING.COM) დღგ-ის თანხას გამოიანგარიშებს იმ თანხიდან, რომელსაც მომხმარებელი იხდის ვებგვერდის მომსახურების სარგებლობისათვის და არა ბინის გაქირავების შედეგად მიღებული შემოსავლიდან", — წერია განცხადებაში.

შემოსავლების სამსახურის მიერ გავრცელებულ რელიზში საუბარია საგადასახდო კანონმდებლობაში შესულ ცვლილებებზეც და აღნიშნულია, რომ ამ ცვლილებების მიზანი დღგ-ის კანონმდებლობის ევროპულ სტანდარტებთან დაახლოვებაა.

"აქვე გაცნობებთ, რომ საქართველოსა და ევროკავშირს შორის გაფორმებული ასოცირების შეთანხმების თანახმად, 2021 წლის 1 იანვრიდან ამოქმედდა ცვლილებები საგადასახადო კანონმდებლობაში, რომლის მიზანია საქართველოს დღგ-ის კანონმდებლობის ევროპულ კანონმდებლობასთან დაახლოვება.

აღნიშნული რეფორმის ფარგლებში, ფინანსთა სამინისტროს შემოსავლების სამსახურსა და მულტინაციონალურ კორპორაციებს (BOOKING, GOOGLE, FACEBOOK, YOUTUBE, NETFLIX, SPOTIFY და ა.შ.) შორის მიმდინარეობს აქტიური კომუნიკაცია დღგ-ის საანგარიშო პერიოდის განსაზრვრისა და საქართველოს ბიუჯეტში ჩარიცხვის ვალდებულების ახალი გამარტივებული წესის შესახებ", — ნათქვამია შემოსავლების სამსახურის განცხადებაში.

ფინანსთა სამინისტროს შემოსავლების სამსახურის ინფორმაციით, შექმნილია პორტალი — https://nr.rs.ge/, რომლის მეშვეობითაც აღნიშნული დასაბეგრ პირებს რეგისტრაციის გავლა და ანგარიშგების განხორციელება შეუძლიათ.